Прысутнасць

“Супакойцеся і ведайце, што Я – Бог”. (Пс 46:10)
Пане, няхай Твой Дух вядзе мяне,
шукаць Тваёй Любячай прысутнасці
больш і больш. Таму што ў ёй
я знаходжу адпачынак і аднаўляю сілы
ў гэтым напружаным свеце.

Свабода

Пане, навучы мяне шанаваць дар свабоды.
Ты даў мне вялікае благаслаўленне свабоды духу.
Напоўні мой дух Тваім супакоем і Тваёй радасцю.

Усведамленне

У гэты момант, Пане, я скіроўваю думкі да Цябе.
Я пакіну ў баку свае справы і клопаты.
Адпачну і аднаўлю сілы ў Тваёй прысутнасці.

Божае слова

³⁹ І расказаў ім такую прыпавесць: «Хіба можа сляпы вадзіць сляпога? Ці ж не зваляцца абодва ў яму? ⁴⁰ Вучань не большы за настаўніка. Але кожны добра падрыхтаваны стане такім, як яго настаўнік. ⁴¹ Чаму бачыш шчэпку ў воку брата свайго, а бервяна ў сваім воку не заўважаеш? ⁴² Як ты можаш казаць брату свайму: “Браце, дай, я выму шчэпку з вока твайго”, калі сам не бачыш бервяна ў сваім воку? Крывадушнік, спачатку вымі бервяно са свайго вока, і тады ўбачыш, як выняць шчэпку з вока твайго брата.

⁴³Няма добрага дрэва, якое б прыносіла дрэнны плод, ці дрэннага дрэва, якое б прыносіла добры плод. ⁴⁴Бо кожнае дрэва пазнаецца па ягоным плодзе; не збіраюць з церняў смоквы, а з куста ажын не збіраюць вінаграду. ⁴⁵Добры чалавек выносіць з добрага скарбу сэрца дабро, а дрэнны чалавек з дрэннага сэрца выносіць зло, бо пра тое, чым напоўнена сэрца, гавораць вусны ягоныя.

Разважанне да Божага слова

Па сутнасці, для хрысціяніна маліцца азначае спрабаваць маліцца. Мы абмежаваныя і ў разуменні, і ў наследаванні Езуса. Таму ніколі не варта судзіць іншых, калі мы настолькі сляпыя наконт саміх сябе. Імкнуцца выправіць свае асабістыя недахопы – гэта досыць вялікая задача на ўсё жыццё. Пане, дапамажы нам бачыць добра, і тады мы зможам быць святлом для іншых.

Любоў выяўляецца на справе, а не на словах. Няхай нашыя добрыя справы гавораць самі за сябе.

Размова

Зараз я ўяўляю перад сабой адну з Асобаў Тройцы, Айца, Сына ці Святога Духа, хто прыйдзе ва ўяўленне найбольш натуральным чынам, і вяду сардэчную размову аб сённяшнім фрагменце Пісання або падзях майго жыцця, якія хвалююць мяне ў гэты момант.

Заканчэнне

Хвала Айцу і Сыну, і Духу Святому.
як было спрадвеку,
цяпер і заўсёды,
і навекі вечныя. Амэн.

Амэн