Прысутнасць

Пане, пакуль я тут,
напоўні маё сэрца і ўсю маю істоту
цудам Тваёй прысутнасці.

Свабода

«Тоўстае і бясформеннае бервяно
ніколі не паверыла б, што можа стаць статуяй,
якой будуць захапляцца як цудам скульптуры,
і ніколі не скарылася б разцу скульптара,
які дзякуючы свайму генію бачыць, што з яго можна зрабіць» (Святы Ігнацый).
Прашу аб ласцы, каб дазволіць любячаму Стварыцелю фармаваць мяне.

Усведамленне

Езу, Ты заўсёды тут, чакаеш мяне.
Дай мне часцей знаходзіць цішыню і спакой,
каб прагнуць праводзіць час у Тваёй прысутнасці,
каб зведацьТвой супакой, Тваю любоў.

Божае слова

³⁷Але як было ў дні Ноя, так будзе і ў час прыйсця Сына Чалавечага. ³⁸Бо, як у дні перад патопам елі, пілі, жаніліся і выходзілі замуж аж да таго дня, калі Ной увайшоў у каўчэг, ³⁹і не ведалі, пакуль не прыйшоў патоп і не забраў усіх, так будзе і ў час прыйсця Сына Чалавечага. ⁴⁰Тады двое будуць у полі: адзін будзе ўзяты, а другі пакінуты. ⁴¹Дзве будуць малоць на жорнах: адна будзе ўзята, а другая пакінута. ⁴²Таму чувайце, бо не ведаеце, у які дзень Пан ваш прыйдзе. ⁴³Знайце ж тое, што, калі б гаспадар дому ведаў, у якую варту прыйдзе злодзей, то не спаў бы і не даў бы падкапаць дом свой. ⁴⁴Таму і вы будзьце гатовыя, бо Сын Чалавечы прыйдзе ў тую гадзіну, калі вы не думаеце.

Разважанне да Божага слова

Езус не просіць нас не спаць начамі, але заклікае жыць у цяперашнім моманце, каб распазнаваць, калі Ён з'яўляецца ў нашай штодзённасці, а гэта часта здараецца нечакана. Ён прыходзіць у сітуацыях, якія немагчыма пралічыць, прыходзіць у выглядзе перашкод і выпадковых падзей, якія могуць спачатку выбіць з раўнавагі. Таму нам патрэбна чуйнасць.

Навучы мяне, Пане, пазнаваць Тваё аблічча, дзе б я Цябе не сустрэў.

Размова

Пане, я ведаю, што калі я звяртаюся да Цябе, мне не патрэбныя словы.
Ты бачыш сэрца.
Ты ведаеш мае жаданні і патрэбы.
Аддаю сябе ў Твае рукі.

Заканчэнне

Я дзякую Богу за магчымасць правесці сам-насам з Ім некалькі хвілін,
і цяпер іду далей з радасцю і надзеяй
служыць Яго народу.

Амэн