Прысутнасць

Быць прысутным – значыць прыйсці і адкрыцца іншаму.
У той момант, калі я прыходжу сюды, Бог ужо чакае мяне.
Бог заўсёды прыходзіць першым, жадаючы злучыцца са мной
і быць бліжэй, чым мой самы блізкі сябар.
Карыстаючыся гэтай магчымасцю, я вітаю Бога, Які так любіць мяне.

Свабода

Буду прасіць Божай дапамогі, каб
быць свабодным ад прадузятасці,
быць адкрытым на Бога падчас малітвы, і
больш пазнаваць, любіць і служыць Яму.

Усведамленне

Жыццё поўнае мітусні, мой Пане.
Часта лепшыя намеры застаюцца няздзейсненымі,
але я ведаю, што Ты са мной ва ўсім, што я кажу і раблю,
і ў людзях, якіх бачу штодня.

Божае слова

³⁸А Ён казаў ім, навучаючы: «Асцерагайцеся кніжнікаў, якія любяць хадзіць у доўгіх шатах, і любяць прывітанні на рынках, ³⁹і першыя лавы ў сінагогах, і першыя месцы на гасцінах. ⁴⁰Тыя, хто аб’ядае дамы ўдоў і доўга моліцца напаказ, атрымаюць найцяжэйшы прысуд».

⁴¹Сеўшы насупраць скарбонкі, Ён назіраў, як людзі кідалі грошы ў скарбонку. Многія багатыя кідалі памногу. ⁴²Прыйшла адна бедная ўдава і ўкінула дзве лепты, што складае адзін кадрант. ⁴³Паклікаўшы вучняў сваіх, Езус сказаў ім: «Сапраўды кажу вам, што гэтая бедная ўдава ўкінула больш за ўсіх, хто кідаў у скарбонку. ⁴⁴Бо ўсе кідалі, маючы лішак, а яна, будучы ў нястачы сваёй, укінула ўсё, што мела, увесь пражытак свой».

Разважанне да Божага слова

Характарыстыка кніжнікаў, якія шанавалі статус і знешні выгляд, а ў той жа час аб'ядалі дамы ўдоў, перагукаецца з тым, што адбываецца ў цяперашнім свеце. Але мы чуем, што эгаістычныя матывацыі выклікаюць нашмат большае асуджэнне.

Доўгія малітвы і ахвяраванне вялікіх сум грошай у скарбонку, матываваныя самалюбствам, маюць малую каштоўнасць у параўнанні з дарам беднай удавы: яе дзвюма дробнымі меднымі манетамі. Памолімся сёння аб ласцы лепшага ўсведамлення прычын сваіх спраў дабрачыннасці, каб бачыць іх сапраўдную каштоўнасць у вачах Бога.

Размова

Пане, Ты выразаў маё імя
на Сваіх далонях.
Нават калі іншыя мяне забываюць,
Ты не забудзеш ніколі.

Заканчэнне

Дзякую, Пане, за дар часу, праведзенага ў Тваёй прысутнасці і за ўсе Твае натхненні.

Амэн