Прысутнасць

Хай радуецца і весяліцца сэрца маё
у гэты час малітвы.
Нагадвай мне часцей пра вялікія
благаслаўленні, якія Ты даеш мне, Божа мой.

Свабода

Стараюся адпусціць хваляванні і турботы,
якія зараз абцяжарваюць мяне.
Аддаю ўсе свае клопаты ў Божыя рукі
– хаця б на гэтыя некалькі хвілін малітвы.

Усведамленне

Як цудоўна мець магчымасць
увайсці ў прысутнасць Тваю, Пане;
незалежна ад таго, які час,
незалежна ад таго, у якой я краіне,
Мне трэба толькі прамовіць Тваё імя.

Божае слова

⁵¹Я — хлеб жывы, які сышоў з неба. Калі хто будзе спажываць гэты хлеб, будзе жыць вечна. А хлеб, які Я дам, — гэта Цела Маё дзеля жыцця свету».

⁵²Юдэі спрачаліся паміж сабою, кажучы: «Як Ён можа даць нам есці сваё цела?» ⁵³Езус жа сказаў ім: «Сапраўды, сапраўды кажу вам: калі не будзеце спажываць Цела Сына Чалавечага і піць Крыві Ягонай, не будзеце мець у сабе жыцця. ⁵⁴Хто спажывае Маё Цела і п’е Маю Кроў, мае жыццё вечнае, і Я ўваскрашу яго ў апошні дзень. ⁵⁵Бо Цела Маё — праўдзівы спажытак, а Кроў Мая – праўдзівы напой. ⁵⁶Хто спажывае Маё Цела і п’е Маю Кроў, трывае ўва Мне, а Я ў ім. ⁵⁷Як паслаў Мяне Айцец, які жыве, а Я жыву прaз Айца, так і той, хто спажывае Мяне, будзе жыць праз Мяне. ⁵⁸Гэта той хлеб, які сышоў з неба, а не той, які елі айцы вашыя і памерлі. Хто спажывае гэты хлеб, будзе жыць навекі».

Разважанне да Божага слова

У Евангеллі хапае прыкладаў таго, як “прыстойныя людзі” абураюцца стаўленнем Езуса: Ён ідзе да мытнікаў, здраднікаў, да тых, хто жыве ў граху. Таму Езуса так лёгка абвінавачваюць: “Ён не можа быць ад Бога. Бог такога не гаворыць!” Як жа часта, дагэтуль, людзі лепш за Бога ведаюць, як і з кім Ён павінен гаварыць, а з кім не.

Пакліканне Мацвея дэманструе, што Бог лепш ведае нашы сэрцы, не грэбуе грэшнікамі, а любіць іх. Тое, як мы асуджаем (ці схільныя асуджаць) іншых людзей у святле этыкі, маралі і прынятых звычаяў, кажа аб тым, што мы заўважылі толькі маленечкую частку таго, што адбываецца з чалавекам на самай справе. Немагчыма пазбавіць яго тытула Божага дзіцяці, але, на сваю бяду, мы часам марнуем на гэта свае сілы.

Прасі Езуса паказаць табе праўду пра чалавека, каб нікога не асуджаць, а навучыцца любіць тых, каго любіць Езус.

Размова

Пане, дапамажы мне злучыцца з Табою. Я не заўсёды ведаю, як, але хачу атрымаць Тваю любоў і адкрываю далоні і сэрца. Калі ласка, прыдзі да мяне сёння.

Заканчэнне

Напоўнены любячай прысутнасцю Бога,
Я прашу Яго благаславіць мяне і накіроўваць мае крокі
у спаўненні Яго волі і супрацоўніцтве з Яго ласкай у сваім штодзённым жыцці.

Амэн