Прысутнасць

У пачатку сённяшняй малітвы звярну ўвагу на сваё дыханне, якое з’яўляецца для мяне Божым дарам, які падтрымлівае жыццё. Адну-дзве хвіліны дыхаю больш павольна, глыбока і спакойна.

Свабода

Дзякуй за дар свабоды, Пане.
Дай мне магчымасць верна ісці за Табою.
Дапамажы заўсёды памятаць пра шляхі Твае,
а таксама пра Тваю любоў і апеку над усім светам.

Усведамленне

Пане, побач з Табою няхай я стану больш падобным да Цябе, каб іншыя ўбачылі ўва мне Хрыста і спазналі Тваю любоў.

Божае слова

¹Убачыўшы натоўп, Езус узышоў на гару. А калі сеў, падышлі да Яго вучні Ягоныя. ²І, адкрыўшы вусны свае, Ён вучыў іх, кажучы:

³«Шчаслівыя ўбогія духам, бо іх ёсць Валадарства Нябеснае.

⁴Шчаслівыя засмучаныя, бо яны будуць суцешаны.

⁵Шчаслівыя лагодныя, бо яны атрымаюць у спадчыну зямлю.

⁶Шчаслівыя галодныя і прагнучыя справядлівасці, бо яны будуць насычаны.

⁷Шчаслівыя міласэрныя, бо яны спазнаюць міласэрнасць.

⁸Шчаслівыя чыстыя сэрцам, бо яны Бога ўбачаць.

⁹Шчаслівыя міратворцы, бо яны будуць названыя сынамі Божымі.

¹⁰Шчаслівыя, каго пераследуюць за справядлівасць, бо іх ёсць Валадарства Нябеснае.

¹¹Шчаслівыя вы, калі будуць вас зневажаць, пераследаваць і ўсяляк зласловіць несправядліва за Мяне. ¹²Радуйцеся і весяліцеся, бо вялікая ўзнагарода вашая ў нябёсах. Бо так пераследавалі прарокаў, якія былі перад вамі.

Разважанне да Божага слова

Выйшаўшы з Егіпта, ізраэльцяне баяліся размаўляць з Богам ці нават знаходзіцца ў Яго прысутнасці. Майсея прасілі размаўляць з Богам сам-насам і пераказваць Ягоныя словы народу. У пропаведзі на гары Езус – Бог, які жыве сярод людзей, – гаворыць не з пазіцыі сілы, а з пазіцыі лагоды. Як чалавек да чалавека. Толькі ў адносінах дыялогу можа развіцца сапраўдная любоў. Аднак нават такога Бога цяжка прыняць. Бо “многім скандал крыжа вытрымаць цяжэй, чым громы Сіная ізраэльцянам” (Бэнэдыкт XVI).

Благаслаўленні – не пахвала пасрэднасці. Сапсаваць чалавека можа не толькі багацце, але і беднасць. Езус мае на ўвазе нешта іншае. Тагачасны Ізраэль у цэлым бедны і паняволены, прагна чакае выканання Божага абяцання. Пытанне ў тым, як і калі яно здзейсніцца? Благаслаўленні запрашаюць глядзець далей за нашы штодзённыя цяжкасці, бо фармуе нас тое, што мы носім у сэрцы, а адвага ў дачыненні да несправядлівасці можа ўзвысіць нас.

Таму мы можам прасіць аб ласцы змяніць перспектыву свайго хрысціянскага жыцця. Гэта нялёгкая просьба. Больш за тое, будзь асцярожны, бо яна можа споўніцца! Езус запрашае цябе да вялікіх спраў.

Размова

Памятаючы, што я ў прысутнасці Бога,
уяўляю Езуса побач
і кажу ўсё, што цяпер маю на думцы і на сэрцы,
размаўляючы як сябра з сябрам.

Заканчэнне

Напоўнены любячай прысутнасцю Бога,
Я прашу Яго благаславіць мяне і накіроўваць мае крокі
у спаўненні Яго волі і супрацоўніцтве з Яго ласкай у сваім штодзённым жыцці.

Амэн