Прысутнасць

Запавольваюся і думаю пра любоў
і ласку, якімі Бог ахінае мяне:
Я створаны паводле вобразу і падабенству Божаму;
у глыбіні майго сэрца жыве Бог .

Свабода

«Тоўстае і бясформеннае бервяно
ніколі не паверыла б, што можа стаць статуяй,
якой будуць захапляцца як цудам скульптуры,
і ніколі не скарылася б разцу скульптара,
які дзякуючы свайму генію бачыць, што з яго можна зрабіць» (Святы Ігнацый).
Прашу аб ласцы, каб дазволіць любячаму Стварыцелю фармаваць мяне.

Усведамленне

Ведаючы, што Бог любіць мяне безумоўна,
Шчыра праглядаю мінулы дзень, падзеі, пачуцці.
За што я маю быць удзячным? Дзякую Пану.
За якія думкі, словы і ўчынкі я адчуваю жаль? Прашу прабачэння за гэта.

Божае слова

¹⁷Не думайце, што Я прыйшоў адмяніць Закон ці Прарокаў. Не адмяніць прыйшоў Я, а выканаць. ¹⁸Бо сапраўды кажу вам: пакуль не міне неба і зямля, ніводная ёта, ніводная рыска не зменіцца ў Законе, пакуль не збудзецца ўсё. ¹⁹Таму, калі хто парушыць адну з гэтых найменшых запаведзяў і навучыць гэтаму людзей, той найменшым назавецца ў Валадарстве Нябесным. Хто ж выканае і навучыць, той вялікім назавецца ў Валадарстве Нябесным.

Разважанне да Божага слова

У прысутнасці тых, хто быў названы шчаслівым і пакліканы быць соллю зямлі і святлом свету, Езус абвяргае абвінавачванні сваіх праціўнікаў. Ён выступаў не супраць закона, а супраць яго няправільных інтэрпрэтацый, якія падкрэслівалі літару, а не дух.

Адмяніць азначае распусціць, знішчыць, перавярнуць, зрабіць несапраўдным. Выканаць азначае здзейсніць, давесці да паўнаты. Езус выконвае закон і прарокаў, аднаўляючы духоўны сэнс тэксту. Вызваліць сябе ад запаведзі азначае вызваліць сябе ад неабходнасці яе выконваць, замест таго, каб дасягнуць сталасці ў той сферы жыцця, да якой адносіцца запаведзь. Абвінаваўцы Езуса адмянілі закон і зрабілі яго несапраўдным, бо ўзвысілі сябе над ім, змяняючы яго па сваім жаданні, прыстасоўваючы да звычаяў і ў выніку размываючы сэнс.

Жыццё Езуса – дасканалае выкананне Божага закону. Святое Пісанне штодня дае нам магчымасць углядацца, услухоўвацца і пераймаць Езуса ў Яго словах і справах.

Размова

Пане, я ведаю, што калі я звяртаюся да Цябе, мне не патрэбныя словы.
Ты бачыш сэрца.
Ты ведаеш мае жаданні і патрэбы.
Аддаю сябе ў Твае рукі.

Заканчэнне

Я дзякую Богу за магчымасць правесці сам-насам з Ім некалькі хвілін,
і цяпер іду далей з радасцю і надзеяй
служыць Яго народу.

Амэн