Прысутнасць

Хай радуецца і весяліцца сэрца маё
у гэты час малітвы.
Нагадвай мне часцей пра вялікія
благаслаўленні, якія Ты даеш мне, Божа мой.

Свабода

«Вельмі мала людзей,
якія разумеюць, што з імі зрабіў бы Бог,
калі б яны аддаліся ў Ягоныя рукі,
і дазволілі Ягонай ласцы сфармаваць сябе» (Святы Ігнацый).
Прашу аб ласцы цалкам даверыцца Божай любові.

Усведамленне

У прысутнасці майго любячага Стварыцеля я шчыра гляджу на свае пачуцці за апошні дзень: уздымы, спады і спакойны стан. Ці бачу, дзе быў Пан?

Божае слова

²⁰ Бо кажу вам, калі справядлівасць ваша не пераўзыдзе справядлівасці кніжнікаў і фарысеяў, то вы не ўвойдзеце ў Валадарства Нябеснае.

²¹Вы чулі, што было сказана продкам: “Не забівай”, а хто заб’е, падлягае суду. ²²22 А Я кажу вам, што кожны, хто гневаецца на брата свайго, падлягае суду. Хто ж скажа брату свайму “рака”, падлягае Сінэдрыёну, а хто скажа “неразумны”, падлягае геене вогненнай. ²³Таму, калі прынясеш дар свой да ахвярніка і ўспомніш там, што брат твой мае нешта супраць цябе, ²⁴пакінь дар свой перад ахвярнікам і ідзі спачатку памірыся з братам сваім, а тады прыйдзі і прынясі свой дар. ²⁵Мірыся з праціўнікам тваім хутка, пакуль ты з ім яшчэ ў дарозе, каб праціўнік не аддаў цябе суддзі, а суддзя не аддаў цябе слугу, і каб не ўкінулі цябе ў вязніцу. ²⁶Сапраўды кажу табе: не выйдзеш адтуль, пакуль не аддасі апошні грош.

Разважанне да Божага слова

Вучні ўжо былі з Езусам некаторы час. Яны слухалі Яго, былі сведкамі цудаў і дзялілі з Ім радасці і смуткі. Цяпер Настаўнік пасылае іх з канкрэтнай місіяй. Падумай на хвіліну пра сваё паўсядзённае жыццё. Куды Езус пасылае цябе сёння?

Пэдра Арупэ SJ так распачынае адну са сваіх знакамітых малітваў: Пане, разважаючы над “нашым спосабам дзеяння”, я спасціг, што ідэалам нашага спосабу дзеяння з’яўляецца Твой спосаб дзеяння. Гляджу на Цябе вачыма веры і сузіраю Твой светлы вобраз, яўлены нам у Евангеллі. Я – адзін з тых, каму пісаў святы Пётр: “Хоць вы не бачылі, любіце Яго і, хоць цяпер не бачыце Яго, верыце ў Яго. Весяліцеся радасцю невыказнаю і найслаўнейшаю”. Пане, Ты сам сказаў нам: “Я даў вам прыклад, каб і вы рабілі, як Я зрабіў вам”. Я жадаю наследаваць Цябе так, каб з іншымі мог сказаць: “Наследуйце мяне, як і я наследую Хрыста”.

Размова

Езу, Ты заўсёды сардэчна вітаў маленькіх дзяцей, калі хадзіў па гэтай зямлі.
Навучы мяне мець дзіцячы давер да Цябе,
памятаючы, што Ты ніколі не пакінеш мяне.

Заканчэнне

Я дзякую Богу за магчымасць правесці сам-насам з Ім некалькі хвілін,
і цяпер іду далей з радасцю і надзеяй
служыць Яго народу.

Амэн