Лк 10:1-19

¹Пасля гэтага Пан вызначыў іншых семдзесят двух і паслаў іх па двое перад сабою ў кожны горад і месца, куды сам меўся пайсці. ²І сказаў ім: «Жніво сапраўды вялікае, ды работнікаў мала; таму прасіце Гаспадара жніва, каб работнікаў паслаў на жніво сваё. ³Ідзіце, вось Я пасылаю вас, як ягнят сярод ваўкоў. ⁴Не бярыце ні каліты, ні торбы, ні сандаляў і ў дарозе нікога не вітайце. ⁵У які б дом ні ўвайшлі, спачатку кажыце: “Спакой гэтаму дому!” ⁶Калі будзе там сын спакою, то на ім спачне спакой ваш. Калі ж не, то вернецца да вас. ⁷Заставайцеся ў тым доме, ешце і піце, што ёсць у іх, бо работнік заслугоўвае платы сваёй. Не пераходзьце з дому ў дом. ⁸Калі прыйдзеце ў які горад, і прымуць вас, ешце, што вам пададуць. ⁹Аздараўляйце ў ім хворых і кажыце ім: “Наблізілася да вас Валадарства Божае”. ¹⁰Калі прыйдзеце ў які горад і не прымуць вас, то выйдзіце на яго вуліцы і скажыце: ¹¹“Нават пыл горада вашага, які прыліп да ног нашых, атрасаем; аднак ведайце, што наблізілася да вас Валадарства Божае”. ¹²Кажу вам, што Садоме ў дзень той будзе лягчэй, чым гораду таму.

¹³Гора табе, Харазін! Гора табе, Бэтсаіда! Бо, калі б у Тыры і Сідоне былі цуды, што сталіся сярод вас, яны б даўно, седзячы ў мешкавіне і ў попеле, пакаяліся. ¹⁴Але Тыру і Сідону лепш будзе на судзе, чым вам. ¹⁵І ты, Кафарнаум,

ці будзеш узвышаны аж да неба? Аж да адхлані нізрынешся!

¹⁶Хто слухае вас, Мяне слухае, і хто вас адкідае, Мяне адкідае. А хто адкідае Мяне, адкідае таго, хто паслаў Мяне».

¹⁷Вярнуліся семдзесят два з радасцю і казалі: «Пане, нават злыя духі
слухаюцца нас у імя Тваё!» ¹⁸А Ён сказаў ім: «Я бачыў сатану, які падаў з неба, як маланка. ¹⁹Вось Я даў вам уладу наступаць на змеяў і скарпіёнаў і на ўсю варожую сілу, і нішто не пашкодзіць вам.

“Copyright © 2021 National Council of Churches of Christ in the United States of America. Used by permission. All rights reserved worldwide.”