Прысутнасць

Езус чакае, ціха і нябачна, магчымасці ўвайсці ў маё сэрца.
Я адгукнуся на Яго прысутнасць.
Ён прыходзіць са сваёй бясконцай моцай і любоўю.
Напаўняе мяне радасцю і спакоем.

Свабода

Нябесны Ойча, дай мне ўсвядоміць увесь цяжар, ​​які цяпер нясу, і Сваёй ласкай дапамажы пакласці яго ля падножжа Хрыстовага Крыжа і свабодна ўвайсці ў гэты час малітвы.

Усведамленне

Усведамляючы Тваю прысутнасць, Пане,
праглядаю сваё нядаўняе мінулае.
Дазволь мне быць шчырым з самім сабой і з Табой
наконт думак, слоў, учынкаў,
бо я ведаю, што Ты любіш праўду ў сэрцы
і прымаеш мяне такім, які я ёсць.

Божае слова

³⁷Калі Ён сказаў гэта, адзін фарысей запрасіў Яго да сябе абедаць. І Ён, увайшоўшы, заняў месца за сталом. ³⁸Фарысей жа здзівіўся, што Ён не абмыў рук перад абедам. ³⁹Але Пан сказаў яму: «Цяпер вы, фарысеі, звонку ачышчаеце кубак і місу, а нутро вашае напоўнена драпежнасцю і злосцю. ⁴⁰Неразумныя! Ці не той, хто стварыў вонкавае, стварыў і тое, што ўнутры? ⁴¹Давайце лепш міласціну з таго, што ўнутры вас, тады ўсё будзе ў вас чыстае.

Разважанне да Божага слова

Сёння мы разважаем пра яшчэ адну сітуацыю, калі фарысей запрасіў Езуса на вячэру. Фарысей занадта непакоіўся рытуальнай чысцінёй і абмыццём рук. Хоць мы цэнім знешнюю чысціню, варта маліцца аб тым, каб Пан адарыў нас чыстымі сэрцамі.

Езус звярнуў увагу на ўнутранае, даючы прыклады кубка і стравы. Тое, што яны змяшчалі ўнутры, было больш важным, чым тое, як яны выглядалі звонку. Мудры чалавек распазнае большую каштоўнасць і засяроджваецца на ёй, свабодна прысвячаючы сябе служэнню, як прасіў Езус.

Размова

Сябры не хаваюць адзін ад аднаго сакрэтаў.
Калі я малюся, ці магу паглядзець на Езуса як на свайго сябра
і падзяліцца з Ім сваім патаемным,
з верай, што Ён мяне разумее?

Заканчэнне

Напоўнены любячай прысутнасцю Бога,
Я прашу Яго благаславіць мяне і накіроўваць мае крокі
у спаўненні Яго волі і супрацоўніцтве з Яго ласкай у сваім штодзённым жыцці.

Амэн