пятніца 18 Кастрычніка •St Luke, Evangelist
Прысутнасць
“Ты, калі молішся, увайдзі ў пакой свой і, зачыніўшы дзверы, маліся да Айца твайго, які ў таемнасці”. (Мц 6:6) Божа, Ты — мой унутраны пакой, Ты заўсёды ўва мне, а я ў Табе. Няхай штодня я прысвячаю час, каб увайсці ў пакой майго сэрца і быць з Табой.
Свабода
Я прашу аб ласцы
адкласці ўсе свае турботы
і быць адкрытым на ўсё, чаго Бог просіць ад мяне,
каб мяне вёў і фармаваў мой любячы Стварыцель.
Усведамленне
Узгадваю кожнага, хто прасіў мяне аб малітве, і даручаю Табе, Пане, разам са сваімі патрэбамі і цяжарамі.
Божае слова
Лк 10:1-91Пасля гэтага Пан вызначыў іншых семдзесят двух і паслаў іх па двое перад сабою ў кожны горад і месца, куды сам меўся пайсці. 2І сказаў ім: «Жніво сапраўды вялікае, ды работнікаў мала; таму прасіце Гаспадара жніва, каб работнікаў паслаў на жніво сваё. 3Ідзіце, вось Я пасылаю вас, як ягнят сярод ваўкоў. 4Не бярыце ні каліты, ні торбы, ні сандаляў і ў дарозе нікога не вітайце. 5У які б дом ні ўвайшлі, спачатку кажыце: “Спакой гэтаму дому!” 6Калі будзе там сын спакою, то на ім спачне спакой ваш. Калі ж не, то вернецца да вас. 7Заставайцеся ў тым доме, ешце і піце, што ёсць у іх, бо работнік заслугоўвае платы сваёй. Не пераходзьце з дому ў дом. 8Калі прыйдзеце ў які горад, і прымуць вас, ешце, што вам пададуць. 9Аздараўляйце ў ім хворых і кажыце ім: “Наблізілася да вас Валадарства Божае”.,
Разважанне да Божага слова
Праз евангеліста Луку мы атрымалі Евангелле спачування і міласэрнасці. Айцец, які паслаў Езуса, кліча нас і таксама шле далей з Добрай навіной для свету. Просім аб ласцы, каб мы маглі дзяліцца чулай любоўю Бога з многімі людзьмі, якія ў ёй маюць патрэбу.
Бедныя маюць прыярытэт у навучанні Езуса, як гэта паказвае нам Лука. Зараз шмат бедных, якім патрэбна надзея і суцяшэння. Будзем жа імкнуцца быць пасланцамі надзеі, якія абвяшчаюць Божае Валадарства справядлівасці, любові і міру.
Размова
Пане, дапамажы мне дастаткова сцішыцца, каб пачуць Твой вельмі ціхі голас. Дапамажы мне давяраць таму, што я чую. Тваё Слова прыносіць палёгку, суцяшэнне і падбадзёрванне. Усё іншае я аддаляю ад сябе.
Заканчэнне
Напоўнены любячай прысутнасцю Бога,
Я прашу Яго благаславіць мяне і накіроўваць мае крокі
у спаўненні Яго волі і супрацоўніцтве з Яго ласкай у сваім штодзённым жыцці.
Амэн
Copyright © 1999-2024 Sacred Space. All rights reserved.
Прастора малітвы – гэта праект ірландскіх езуітаў.