Прысутнасць

О Пане, Ты назваў мяне па імені,
запісаў на Сваіх далонях.
Дазволь мне ўзрастаць у даверы і ніколі не паддавацца адчаю.

Свабода

Пане, навучы мяне шанаваць дар свабоды.
Ты даў мне вялікае благаслаўленне свабоды духу.
Напоўні мой дух Тваім супакоем і Тваёй радасцю.

Усведамленне

Пане, Ты даў мне начны адпачынак.
У дзённы час не дазволь мне забыцца пра Тваю дабрыню.
Накіруй мяне і пакажы, як дзяліцца Тваімі благаслаўленнямі з іншымі.

Божае слова

³⁵Падышлі да Езуса Якуб і Ян, сыны Зэбэдэя, і сказалі Яму: «Настаўнік, мы хочам, каб Ты зрабіў нам тое, пра што Цябе папросім». ³⁶Ён жа адказаў ім: «Што хочаце, каб Я зрабіў вам?» ³⁷Яны сказалі Яму: «Дай нам сесці аднаму праваруч, а другому леваруч Цябе ў славе Тваёй». ³⁸Але Езус сказаў ім: «Не ведаеце, аб чым просіце. Ці можаце піць келіх, які Я п’ю, і прыняць хрост, якім Я ахрышчаны?» ³⁹ Яны адказалі Яму: «Можам». А Езус сказаў ім: «Келіх, які Я п’ю, піць будзеце, і хростам, якім Я хрышчуся, будзеце ахрышчаны, ⁴⁰але даць сесці праваруч ці леваруч Мяне не ад Мяне залежыць, а каму падрыхтавана».

⁴¹Пачуўшы, дзесяць вучняў пачалі абурацца на Якуба і Яна. ⁴²А Езус, паклікаўшы іх, сказаў ім: «Вы ведаеце, што тыя, хто лічыцца кіраўнікамі народаў, пануюць над імі, і вяльможы іх валадараць над імі. ⁴³Але не так няхай будзе сярод вас: хто хоча быць большым сярод вас, няхай будзе вам слугою; ⁴⁴і хто хоча сярод вас быць першым, няхай будзе нявольнікам усіх. ⁴⁵Бо і Сын Чалавечы не для таго прыйшоў, каб Яму служылі, але каб служыць і аддаць жыццё сваё для адкуплення многіх».

Разважанне да Божага слова

Езус пачуў амбітныя памкненні Якуба і Яна, аднак паказвае, як перанакіраваць іх. Няхай нашы амбіцыі, якія даюць нам энергію, будуць накіраваны на хвалу Божую.

Усім апосталам было цяжка ісці за Езусам, бо ў кожнага былі свае праблемы і недахопы, як і ва ўсіх нас. Езус імкнуўся вывесці іх за межы асабістых інтарэсаў і навучыць быць «людзьмі для іншых». Пане, дай нам наследаваць Цябе, які прыйшоў служыць і ахвяраваў за нас жыццё.

Размова

Часам я задаюся пытаннем, што б я сказаў, калі б сустрэўся з Табой асабіста, Пане.
Магчыма, так: “Дзякую, Божа, што Ты заўсёды са мной”.
Я дакладна ведаю, што былі часы, калі Ты нёс мяне, Пане,
калі дзякуючы Тваёй сіле я перажыў цёмныя перыяды жыцця.

Заканчэнне

Дзякую, Пане, за дар часу, праведзенага ў Тваёй прысутнасці і за ўсе Твае натхненні.

Амэн