панядзелак 21 Кастрычніка
Прысутнасць
Бог са мной, больш за тое, Бог ўва мне.
Хоць на хвіліну затрымаюся ў жыццядайнай прысутнасці Бога
у целе, розуме і сэрцы,
вось цяпер.
Свабода
Нябесны Ойча, дай мне ўсвядоміць увесь цяжар, які цяпер нясу, і Сваёй ласкай дапамажы пакласці яго ля падножжа Хрыстовага Крыжа і свабодна ўвайсці ў гэты час малітвы.
Усведамленне
Дапамажы мне, Пане, лепш усведамляць Тваю прысутнасць.
Навучы мяне распазнаваць Тваю прысутнасць у іншых.
А сэрца напоўні ўдзячнасцю за выпадкі, калі Ты дзейнічаў праз іншых людзей, выяўляючы нязмерную любоў і клопат.
Божае слова
Лк 12:13-2113Нехта з натоўпу сказаў Яму: «Настаўнік, скажы брату майму, каб ён падзяліўся са мною спадчынай». 14Але Ён адказаў яму: «Чалавеча, хто паставіў Мяне над вамі суддзёю або пасрэднікам?» 15І сказаў ім: «Глядзіце, сцеражыцеся ўсялякай прагнасці, бо нават калі хтосьці мае дастатак, жыццё яго не залежыць ад ягонай маёмасці». 16І расказаў ім прыпавесць: «У аднаго багатага чалавека добра ўрадзіла поле. 17І ён разважаў сам-насам: “Што мне рабіць? Няма куды мне сабраць ураджай мой”. 18І сказаў: “Вось што зраблю: паламаю засекі мае і збудую большыя, і збяру туды ўсё збожжа маё і ўсё дабро маё. 19І скажу душы маёй: Душа, шмат дабра ў цябе ляжыць на многія гады. Адпачывай, еш, пі і весяліся”. 20Але Бог сказаў яму: “Неразумны! Гэтай жа ноччу забяруць душу тваю ў цябе. Каму ж дастанецца тое, што ты нарыхтаваў?” 21Так бывае з тым, хто збірае сабе скарбы, а не багацее перад Богам».
Разважанне да Божага слова
Маёмасць і спадчына нярэдка становяцца важкімі праблемамі і спараджаюць шмат канфліктаў. Для многіх людзей пачуццё бяспекі магчымае толькі калі ёсць штосьці ва ўласнасці. З Божай дапамогай мы можам заставацца свабоднымі і бачыць усё як дар, адчуваючы сапраўдную бяспеку ў Пану.
Памнажэнне, назапашванне і збераганне набываюць для некаторых (або нават многіх?) людзей празмернае значэнне. Езус казаў, што трэба быць свабодным і не турбавацца аб часовых рэчах, такіх як ежа і адзенне (Лк 12:22–34). Пане, дапамажы нам распазнаваць, што мае прыкметы вечнай каштоўнасці, і памятаць, што Ты з’яўляешся нашым скарбам.
Размова
Маўкліва сяджу з маім Богам, які ведае кожную маю думку, кожную патрэбу і кожнае жаданне, і дазваляю Яму служыць мне ў гэты момант. Я атрымліваю неабходны для далейшай дарогі пасілак.
Заканчэнне
Дзякую, Пане, за дар часу, праведзенага ў Тваёй прысутнасці і за ўсе Твае натхненні.
Амэн
Copyright © 1999-2024 Sacred Space. All rights reserved.
Прастора малітвы – гэта праект ірландскіх езуітаў.