Прысутнасць

Пане, Ты заўсёды побач
і чакаеш мяне.
Прагну жыць так, каб ніколі не быць занадта занятым
і не адкладаць сустрэчы з Табой.

Свабода

«У тыя дні Бог вучыў мяне,
як школьны настаўнік вучня» (св. Ігнацый).
Я нагадваю сабе, што ёсць рэчы, якім Бог яшчэ не навучыў мяне,
і прашу адарыць ласкай, каб пачуць іх і дазволіць змяніць мяне.

Усведамленне

О, Пане, дазволь мне свядома і ўдзячна
прыняць усе ласкі, якія Ты спасылаеш мне.
Няхай мне заўсёды хапае велікадушнасці, каб дзяліцца сваімі благаслаўленнямі з іншымі.

Божае слова

²⁴Але ў тыя дні пасля тугі такой

зацьміцца сонца, і месяц не дасць святла свайго.

²⁵І зоркі будуць падаць з неба, і сілы нябесныя пахіснуцца.

²⁶Тады ўбачаць Сына Чалавечага, які будзе ісці на аблоках з вялікай сілай і ў славе. ²⁷Ён пашле тады анёлаў і збярэ выбраных сваіх ад чатырох вятроў, ад краю зямлі да краю неба.

²⁸Вучыцеся на прыкладзе смакоўніцы: калі галінка яе становіцца ўжо мяккай і пускае лісце, ведаеце, што блізка лета. ²⁹Так і вы, калі ўбачыце, што адбываецца гэта, ведайце, што блізка, пры дзвярах. ³⁰Сапраўды кажу вам: не міне пакаленне гэтае, як усё гэта адбудзецца. ³¹Неба і зямля мінуць, а словы Мае не мінуць.

³²А пра дзень той або гадзіну ні анёлы ў небе, ні Сын, ніхто не ведае, а толькі Айцец.

Разважанне да Божага слова

Набліжаючыся да заканчэння літургічнага года, мы прыгадваем, што некалі Сын Чалавечы прыйдзе на аблоках з вялікай моцай і славай. Пане, дапамажы нам дацаніць глыбокае пасланне надзеі ў Тваім абяцанні сабраць нас разам для вечнага жыцця.

У гэтым свеце мы вучымся заўважаць прыкметы часу і надвор'я, прадчуваючы надыход лета, напрыклад. Мы не павінны клапаціцца аб тым, калі і як Езус можа прыйсці. Нам патрэбна вера, каб пачувацца ў бяспецы сярод перамен і нават канца вякоў, калі ён наступіць, захоўваючы пэўнасць, што словы Пана, якія ёсць жыццём, не прамінуць ніколі.

Размова

Каб камунікаваць, нам не заўсёды трэба размаўляць.
Калі ўяўляю сябе поруч з Езусам…
і проста гляджу на Яго, а Ён на мяне…
…як я сябе адчуваю?

Заканчэнне

Я дзякую Богу за магчымасць правесці сам-насам з Ім некалькі хвілін,
і цяпер іду далей з радасцю і надзеяй
служыць Яго народу.

Амэн