Прысутнасць

У пачатку сённяшняй малітвы звярну ўвагу на сваё дыханне, якое з’яўляецца для мяне Божым дарам, які падтрымлівае жыццё. Адну-дзве хвіліны дыхаю больш павольна, глыбока і спакойна.

Свабода

Пане, занадта часта я думаю, што самастойна кантралюю сваё жыццё.
Дапамажы мне ўсвядоміць бяссілле перад многімі рэчамі.
Дай ласку і здольнасць аддаць Табе сваё жыццё
і адчуць радасць гэтай свабоды.

Усведамленне

Духу Святы, прыйдзі і пасяліся ўва мне. Дай мне пазнаць, што я ўмілаванае дзіця Божае.

Божае слова

¹²Як вы думаеце? Калі ў нейкага чалавека было сто авечак, і адна з іх заблукала, ці не пакіне ён дзевяноста дзевяць у гарах і не пойдзе шукаць тую, што заблукала? ¹³Калі ж удасца знайсці яе, сапраўды кажу вам, ён радуецца ёй больш, чым дзевяноста дзевяці, якія не заблукалі. ¹⁴Так няма волі вашага Айца, які ў нябёсах, каб загінуў адзін з тых малых.

Разважанне да Божага слова

Тэма Бога як пастыра народа Божага вельмі моцная як у Старым, так і ў Новым Запавеце. Яму цалкам прысвечаны псальм 23 (22). У Евангеллі паводле Яна гэта адна з галоўных тэм. Езус кажа, што аддасць сваё жыццё за авечак.

Наш Бог – Бог міласэрнасці. Абернемся ў малітве назад, на пражытыя гады, і падзякуем Яму за міласэрнасць і шматлікія ласкі ў адносінах да нас.

Размова

Якія пачуцці ўзнікаюць ва мне, калі я малюся і разважаю над Божым Словам?
Я ўяўляю самога Езуса, які сядзіць ці стаіць каля мяне, і адкрываю Яму сваё сэрца.

Заканчэнне

Хвала Айцу і Сыну, і Духу Святому.
як было спрадвеку,
цяпер і заўсёды,
і навекі вечныя. Амэн.

Амэн