Прысутнасць

Пане, Ты заўсёды побач
і чакаеш мяне.
Прагну жыць так, каб ніколі не быць занадта занятым
і не адкладаць сустрэчы з Табой.

Свабода

Нябесны Ойча, дай мне ўсвядоміць увесь цяжар, ​​які цяпер нясу, і Сваёй ласкай дапамажы пакласці яго ля падножжа Хрыстовага Крыжа і свабодна ўвайсці ў гэты час малітвы.

Усведамленне

Усведамляючы Тваю прысутнасць, Пане,
праглядаю сваё нядаўняе мінулае.
Прагну быць шчырым з самім сабой адносна ўсяго, што адбылося,
і сваіх думак, слоў і ўчынкаў,
бо я ведаю, што Ты любіш праўду ў сэрцы
і прымаеш мяне такім, які я ёсць.

Божае слова

²⁸Прыйдзіце да Мяне, усе спрацаваныя і абцяжараныя, і Я супакою вас. ²⁹Вазьміце ярмо Маё на сябе і навучыцеся ад Мяне, бо Я ціхі і пакорны сэрцам, і знойдзеце спакой для сваіх душаў. ³⁰Бо ярмо Маё прыемнае, і цяжар Мой лёгкі»

Разважанне да Божага слова

Які Бог? Аднойчы апостал Філіп папрасіў Езуса паказаць ім Айца. Езус адказаў: «Столькі часу Я з вамі, а ты не ведаеш Мяне? Хто Мяне бачыў, бачыў і Айца». Езус прыйшоў, каб адкрыць нам Айца.

У малітве мы дзелімся радасцю, смуткам і надзеяй з Езусам, нашым сябрам, які мае ціхае і пакорнае сэрца. Можам сказаць разам з псальмістам: «Суцяшаў і супакойваў маю душу; як дзіця спачывае на руках маці, так душа мая» (Пс 131).

Размова

Паразважаю, як я сёння слухаў Божае слова. Што я хацеў бы ўзяць з сабой? Што хачу запомніць з сённяшняга чытання?

Заканчэнне

Я дзякую Богу за магчымасць правесці сам-насам з Ім некалькі хвілін,
і цяпер іду далей з радасцю і надзеяй
служыць Яго народу.

Амэн