Прысутнасць

У любы час дня і ночы мы можам паклікаць Езуса.
Ён заўсёды чакае нашага запрашэння.
Якое ж гэта благаслаўленне!
Не патрэбныя тэлефоны і электронныя паведамленні, толькі шэпт.

Свабода

Бог не чужы маёй свабодзе.
Наадварот, Дух удыхае жыццё ў самыя ўтоеныя жаданні,
далікатна падштурхоўвае мяне да ўсялякага дабра.
Прашу аб ласцы, каб дазволіць Духу агарнуць мяне.

Усведамленне

Узгадваю кожнага, хто прасіў мяне аб малітве, і даручаю Табе, Пане, разам са сваімі патрэбамі і цяжарамі.

Божае слова

¹⁸Нараджэнне Езуса Хрыста было такім. Пасля заручын Маці Ягонай Марыі з Юзафам, перш чым яны пачалі жыць разам, Яна зачала ад Духа Святога. ¹⁹Юзаф жа, муж Яе, будучы справядлівым і не жадаючы зняславіць Яе, хацеў патаемна адпусціць Яе. ²⁰Калі ён надумаў гэта, вось анёл Пана з’явіўся яму ў сне і сказаў: «Юзэфе, сыне Давіда, не бойся прыняць Марыю, жонку тваю, бо зачатае ў Ёй ёсць ад Духа Святога. ²¹Яна ж народзіць Сына, а ты дасі Яму імя Езус, бо Ён збавіць народ свой ад грахоў ягоных». ²²А ўсё гэта сталася, каб збылося сказанае Панам праз прарока, які кажа:

²³«Вось Дзева зачне і народзіць Сына, і дадуць Яму імя Эммануэль,

што азначае “з намі Бог”».

²⁴Абудзіўшыся ад сну, Юзаф зрабіў, як загадаў яму анёл Пана, і прыняў жонку сваю.

Разважанне да Божага слова

Напэўна, гэта быў вельмі цяжкі час для Марыі і Юзафа. Відавочна, што Юзаф ламаў галаву над тым, што яму рабіць, і нарэшце вызначыўся з канкрэтнымі дзеяннямі, перш чым умяшаўся анёл. Бог і нас часам пакідае ламаць галаву над тым, што рабіць у складаных абставінах. Праз малітву і ўважлівае распазнаванне ў святле Евангелля мы маем надзею, што Бог пакажа нам шлях.

Юзаф, як і Марыя, асаблівым чынам выбраны Богам. Ён, як мы чытаем, «чалавек справядлівы», і ў дабрыні сэрца хоча пазбавіць Марыю ад сораму і ганьбы сярод суседзяў. Паслухмяны пасланню анёла, ён стаўся ўзорам для ўсіх хрысціян, якія імкнуцца выконваць Божую волю. Папросім аб ласцы пазнання і выканання Божай волі і асабліва молімся за ўсе сужэнскія пары.

Размова

Зараз я ўяўляю перад сабой адну з Асобаў Тройцы, Айца, Сына ці Святога Духа, хто прыйдзе ва ўяўленне найбольш натуральным чынам, і вяду сардэчную размову аб сённяшнім фрагменце Пісання або падзях майго жыцця, якія хвалююць мяне ў гэты момант.

Заканчэнне

Я дзякую Богу за магчымасць правесці сам-насам з Ім некалькі хвілін,
і цяпер іду далей з радасцю і надзеяй
служыць Яго народу.

Амэн