Прысутнасць

Хвілінку паразважаю над прысутнасцю Бога вакол мяне і ўва мне.
Стварыцель сусвету, сонца і месяца, зямлі,
кожнай малекулы, кожнага атама, усяго, што ёсць:
Бог у кожным удары сэрца. Бог са мной – цяпер.

Свабода

Бог не чужы маёй свабодзе.
Наадварот, Дух удыхае жыццё ў самыя ўтоеныя жаданні,
далікатна падштурхоўвае мяне да ўсялякага дабра.
Прашу аб ласцы, каб дазволіць Духу агарнуць мяне.

Усведамленне

Усведамляючы Тваю прысутнасць, Пане,
праглядаю сваё нядаўняе мінулае.
Дазволь мне быць шчырым з самім сабой і з Табой
наконт думак, слоў, учынкаў,
бо я ведаю, што Ты любіш праўду ў сэрцы
і прымаеш мяне такім, які я ёсць.

Божае слова

⁵⁷Альжбеце ж надышоў час нараджаць, і яна нарадзіла сына. ⁵⁸Калі пачулі суседзі і сваякі яе, што Пан учыніў вялікай міласэрнасць сваю да яе, радаваліся разам з ёю.

⁵⁹На восьмы дзень прыйшлі абразаць дзіця і хацелі назваць яго імем бацькі ягонага, Захарыем. ⁶⁰Але, адказваючы, маці ягоная сказала: «Не, але будзе названы Янам». ⁶¹Тады сказалі ёй: «Няма нікога з тваёй радні, хто б называўся такім імем». ⁶²У бацькі ж ягонага пыталіся на мігах, як бы хацеў назваць яго. ⁶³Ён, папрасіўшы таблічку, напісаў: «Ян — імя яго». І ўсе здзівіліся. ⁶⁴У гэты момант адразу адкрыліся вусны ягоныя і развязаўся язык ягоны, і ён загаварыў, праслаўляючы Бога. ⁶⁵Ахапіў страх усіх суседзяў іхніх, і па ўсёй горнай краіне Юдэі яны расказвалі пра ўсё гэта. ⁶⁶Усе, хто чуў, разважалі пра гэта ў сэрцах сваіх і казалі: «Што ж гэта будзе за дзіця?» Бо рука Пана была з ім.

Разважанне да Божага слова

Імя «Ян» – габрэйскага паходжання і азначае «Бог міласэрны». І Альжбета, і Захарыя прызналі, што Бог сапраўды праявіў да іх вялікую міласэрнасць Наш Бог нязменна міласэрны да кожнага з нас, любіць нас вечнай любоўю.

У Ісаі мы чытаем: «Я назваў цябе па імені тваім, ты Мой» (Іс 43:1). У садзе ўваскрасення Марыя Магдалена пазнала Езуса, калі Ён назваў яе па імені. Дазволь Яму цяпер падчас асабістай малітвы назваць цябе па імені і адгукніся на Яго бязмерную любоў, як падкажа сэрца.

Размова

Твае ўласныя словы, Пане, навучылі мяне маліцца.
цудоўная малітва “Ойча наш”
змяшчае ўсё, што я хацеў бы сказаць.

Заканчэнне

Дзякую, Пане, за дар часу, праведзенага ў Тваёй прысутнасці і за ўсе Твае натхненні.

Амэн