Прысутнасць

Езу, сёння я звяртаюся да Цябе інакш, чым звычайна. Часцей я прыходжу з просьбамі. Сёння хачу проста пабыць у Тваёй прысутнасці. Няхай маё сэрца адгукнецца на Тваю Любоў.

Свабода

«У тыя дні Бог вучыў мяне,
як школьны настаўнік вучня» (св. Ігнацый).
Я нагадваю сабе, што ёсць рэчы, якім Бог яшчэ не навучыў мяне,
і прашу адарыць ласкай, каб пачуць іх і дазволіць змяніць мяне.

Усведамленне

Пане, мой Божа, у Тваёй любячай прысутнасці я разгортваю свой дзень, нібы скрутак,
пачынаючы з гэтага часу і азіраючыся назад, момант за момантам.
У кожным з іх я вылучаю дабро і святло, ва ўдзячнасці.
Затым звяртаю ўвагу на цені і на тое, што яны мне кажуць,
шукаючы ў Цябе аздараўлення, разумення і прабачэння.

Божае слова

¹⁷Асцерагайцеся людзей, бо вас будуць аддаваць у суды і ў сінагогах сваіх будуць біць вас. ¹⁸Павядуць вас да намеснікаў і да каралёў за Мяне дзеля сведчання перад імі і язычнікамі. ¹⁹Калі ж будуць выдаваць вас, не турбуйцеся, як або што сказаць, бо дадзена будзе вам у тую гадзіну, што сказаць. ²⁰Бо не вы будзеце гаварыць, а Дух Айца вашага гаварыць будзе ў вас. ²¹Брат выдасць брата на смерць, і бацька дзіця; і паўстануць дзеці супраць бацькоў, і заб’юць іх. ²²Усе будуць ненавідзець вас за імя Маё. Але той, хто вытрывае да канца, будзе збаўлены.

Разважанне да Божага слова

Езус папярэджвае пра будучы пераслед вучняў, але абяцае збаўленне тым, хто выстаіць. У адным з пасланняў святы Павел піша, што Пан сказаў яму: «Хопіць табе Маёй ласкі». Пане, Ты сказаў нам, што ніколі не пакінеш нас. Дапамажы нам адважыцца напоўніцу давяраць Табе, ведаючы, што Твой Святы Дух жыве ў нашых сэрцах.

Размова

Паразважаю, як я сёння слухаў Божае слова. Што я хацеў бы ўзяць з сабой? Што хачу запомніць з сённяшняга чытання?

Заканчэнне

Я дзякую Богу за магчымасць правесці сам-насам з Ім некалькі хвілін,
і цяпер іду далей з радасцю і надзеяй
служыць Яго народу.

Амэн