Прысутнасць

Калі я прыходжу да Цябе, Пане,
Я ведаю, што знаходжуся ў прысутнасці майго Стварыцеля.
Ты стварыў мяне з любові.
Ты ведаеш нават, колькі валасоў у мяне на галаве.
Твая прысутнасць, о Пане, – найвялікшы дар.

Свабода

Дзякуй за дар свабоды, Пане.
Дай мне магчымасць верна ісці за Табою.
Дапамажы заўсёды памятаць пра шляхі Твае,
а таксама пра Тваю любоў і апеку над усім светам.

Усведамленне

Як цудоўна мець магчымасць
увайсці ў прысутнасць Тваю, Пане;
незалежна ад таго, які час,
незалежна ад таго, у якой я краіне,
Мне трэба толькі прамовіць Тваё імя.

Божае слова

²Тады пабегла і прыйшла да Сымона Пятра і да другога вучня, якога любіў Езус, і сказала ім: «Забралі Пана з магілы, і не ведаем, дзе паклалі Яго!» ³Тады выйшаў Пётр і другі вучань, і пайшлі да магілы. ⁴Пабеглі абодва разам. Другі вучань пабег наперадзе хутчэй за Пятра і прыбыў да магілы першы. ⁵Заглянуўшы, убачыў, што ляжаць палотны, аднак не ўвайшоў. ⁶Тады прыйшоў услед за ім Сымон Пётр, увайшоў у магілу і ўбачыў палотны, якія там ляжалі, ⁷і хусту, якая была на галаве Ягонай, не з палотнамі яна ляжала, а асобна, скручаная на іншым месцы. ⁸Тады ўвайшоў і другі вучань, што прыбег першы да магілы, убачыў і паверыў.

Разважанне да Божага слова

Пра сваё Уваскрасенне Езус найперш паведаміў жанчынам, якія верна ішлі за Ім аж да падножжа крыжа. Аднак, калі яны ідуць і абвяшчаюць гэтую вестку апосталам, ім не вераць. Але штосьці са слоў, сказаных Езусам перад смерцю, здаецца, прыгадалася ім, і Пётр з Янам бягуць да магілы, каб у гэтым пераканацца.

Вядома, што людзі могуць успрымаць вельмі невялікую частку рэчаіснасці. Магчыма, і ў цябе бываюць моманты сумневаў, што Бог любіць і застаецца верным Сваім абяцанням? Наша малітва так часта падобная на малітву бацькі, чыйго сына вучні Езуса не змаглі вылечыць: «Веру, Пане, дапамажы майму нявер'ю».

Размова

Езус часта задаваў пытанні тым, хто прыходзіў да Яго.
Адчуваючы Яго цяпер побач,
уяўлю, што Ён пытаецца ў адказ на маю малітву:
“Чаго ты жадаеш?”
“Як табе дапамагчы?”
“Што Я магу табе даць?”

Заканчэнне

Я дзякую Богу за магчымасць правесці сам-насам з Ім некалькі хвілін,
і цяпер іду далей з радасцю і надзеяй
служыць Яго народу.

Амэн