Прысутнасць

На момант я спыняюся і разважаю пра жыватворчую прысутнасць Бога
Думаю, як рэчаіснасць навокал,
паветра, усё маё цела
іскрыць прысутнасцю Бога.

Свабода

Пане, Ты стварыў мяне жыць у свабодзе.
У асноўным я ўспрымаю гэты дар як належнае.
Натхні мяне жыць у свабодзе, якую Ты задумаў для мяне,
са спакойным сэрцам і поўным даверам да Цябе.

Усведамленне

Часам клопаты гэтага свету ахопліваюць мяне.
У такія хвіліны дазволь мне памятаць
пра раскошу Тваёй прысутнасці,
Тваёй бясконцай любові да мяне.

Божае слова

¹³Калі адышлі, анёл Пана з’явіўся Юзафу ў сне і сказаў: «Устань, вазьмі Дзіця і Маці Яго і ўцякай у Егіпет, і будзь там, пакуль не скажу табе, бо Ірад будзе шукаць Дзіця, каб загубіць Яго». ¹⁴Падняўшыся, ён узяў Дзіця і Маці Яго ноччу і адправіўся ў Егіпет. ¹⁵Быў там да смерці Ірада, каб збылося сказанае Панам праз прарока: «З Егіпта Я паклікаў Сына Майго».

¹⁶Тады Ірад, убачыўшы, што мудрацы ашукалі яго, вельмі разгневаўся і паслаў пазабіваць усіх хлопцаў у Бэтлееме ды ва ўсіх ваколіцах яго, ад двух гадоў і менш, паводле часу, які выведаў ад мудрацоў. ¹⁷Так збылося сказанае прарокам Ераміем:

¹⁸«Голас у Раме чутны, плач і лямант вялікі. Рахэль аплаквае дзяцей сваіх і не хоча суцешыцца, бо іх няма».

Разважанне да Божага слова

Нявінныя немаўляты губляюць жыццё з-за нянавісці Ірада да Дзіцятка Езуса і таму становяцца мучанікамі. Доўгі шэраг мучанікаў за Хрыста папаўняецца да нашых дзён.

Святы Юзаф, кіраваны Духам Святым, ахоўвае даверанае яму Дзіця і Маці. Памолімся да святога Юзафа, каб дапамог нам клапаціцца і абараняць усіх тых, за каго мы нясём адказнасць.

Размова

О, Пане, будзь заўсёды побач.
Ствары ўва мне даверлівае сэрца.
Дзякую Табе за любоў.

Заканчэнне

Хвала Айцу і Сыну, і Духу Святому.
як было спрадвеку,
цяпер і заўсёды,
і навекі вечныя. Амэн.

Амэн