Прысутнасць

О Пане, Ты назваў мяне па імені,
запісаў на Сваіх далонях.
Дазволь мне ўзрастаць у даверы і ніколі не паддавацца адчаю.

Свабода

Пане, дай мне ласку вызваліцца ад усяго лішняга. Не дазволь прагнасці злавіць мяне ў сваю пастку. Захавай маё сэрца і розум свабоднымі, каб любіць Цябе і служыць Табе.

Усведамленне

Калі я размаўляю з Табою, Божа,
дапамажы мне ўзрастаць ва ўдзячнасці за дар камунікацыі.
Учыні так, каб я гаварыў за тых, хто не мае голасу
і заўсёды меў добрае слова для людзей у патрэбе.

Божае слова

¹На пачатку было Слова, і Слова было ў Бога, і Богам было Слова. ²Яно было ў Бога на пачатку. ³Усё праз Яго сталася, і без Яго нічога не сталася з таго, што сталася. ⁴У Ім было жыццё, і жыццё было святлом людзей. ⁵А святло свеціць у цемры, і цемра не агарнула яго.

⁶З’явіўся чалавек, пасланы ад Бога; імя ягонае было Ян. ⁷Ён прыйшоў дзеля сведчання, каб засведчыць пра святло, каб усе паверылі праз яго. ⁸Не быў ён святлом, але быў пасланы даць сведчанне пра святло. ⁹Было святло праўдзівае, якое асвятляе кожнага чалавека, які прыходзіць на свет.

¹⁰У свеце было, і свет праз Яго стаўся, і свет не пазнаў Яго. ¹¹Да свайго прыйшло, і свае Яго не прынялі. ¹²А тым, якія прынялі Яго, дало ўладу стаць Божымі дзецьмі, што вераць у імя Ягонае, ¹³якія не ад крыві, і не ад жадання цела, і не ад жадання мужа, але ад Бога нарадзіліся.

¹⁴Слова сталася целам і пасялілася між намі, і ўбачылі мы славу Ягоную, славу, якую мае ад Айца Адзінародны, поўны ласкі і праўды. ¹⁵Ян сведчыць пра Яго і ўсклікае, кажучы: «Гэта быў той, пра каго я сказаў: за мною ідзе той, які апярэдзіў мяне, таму што быў раней за мяне». ¹⁶Бо з паўнаты Ягонай мы ўсе прынялі ласку замест ласкі. ¹⁷Бо Закон быў дадзены праз Майсея, а ласка і праўда сталіся праз Езуса Хрыста. ¹⁸Бога ніхто ніколі не бачыў. Адзінародны Бог, які ва ўлонні Айца, Ён адкрыў».

Разважанне да Божага слова

Тэма святла – улюбёная тэма Евангелля паводле Яна, дзе акцэнтуецца прасвятленне розуму, які такім чынам адкрываецца на Божае Аб'яўленне. Езус – святло, якое прыйшло ў свет, каб прасвятліць усіх, хто Яго прыме. Ён прыходзіць, каб адкрыць, якім насамрэч з’яўляецца Бог, Яго Айцец. «Словы, што Я кажу вам, не ад сябе кажу. Айцец, які ўва Мне, Ён чыніць справы» (Ян 14, 10).

Калі мы чытаем Евангелле рэгулярна, то даведваемся пра Езуса больш і больш. Але толькі праз сустрэчу з ім у шчырай малітве мы можам пазнаць Яго асабіста, адчуць, які Ён.
Пане, няхай наша штодзённая малітва стане радаснай сустрэчай з Табой.

Размова

Езу, Ты прамаўляеш да мяне праз словы Евангелля.
Прагну сёння адказаць на Твой заклік.
Навучы мяне распазнаваць Тваю руку сярод паўсядзённых спраў.

Заканчэнне

Я дзякую Богу за магчымасць правесці сам-насам з Ім некалькі хвілін,
і цяпер іду далей з радасцю і надзеяй
служыць Яго народу.

Амэн