Прысутнасць

Затрымаюся на момант,
разважаючы пра жыццядайную прысутнасць Бога
ува мне і ва ўсім вакол мяне,
і ва ўсім маім жыцці.

Свабода

“Спакойна пакіньце мяне тут аднаго, у камеры, дзе ніколі не бывае сонечнага святла. Нават калі ніхто і ніколі не загаворыць са мной, гэтая залатая цішыня робіць мяне свабодным”. Частка верша, напісанага вязнем канцлагера Дахаў.

Усведамленне

Як я пачуваюся сёння?
Ці побач з Богам ці далёка ад Яго? Як мае адносіны з іншымі?
Ці ёсць за што быць удзячным? Дзякую…
Ці ёсць за што шкадаваць? Прашу прабачэння…

Божае слова

²⁹На другі дзень убачыў Ян Езуса, які ішоў да яго, і сказаў: «Вось Баранак Божы, які бярэ на сябе грэх свету. ³⁰Гэта той, пра якога я сказаў: пасля мяне ідзе Муж, які апярэдзіў мяне, бо Ён быў раней за мяне. ³¹Я не ведаў Яго, але для таго прыйшоў я хрысціць вадою, каб Ён аб’явіўся Ізраэлю». ³²І засведчыў Ян, кажучы: «Я бачыў Духа, які сыходзіў як голуб з неба і застаўся на Ім. ³³Я не ведаў Яго, але той, хто паслаў мяне хрысціць вадою, сказаў мне: “Над кім убачыш Духа, які сыходзіць і застаецца на Ім, той ёсць тым, хто хрысціць Духам Святым”. ³⁴І я бачыў, і засведчыў, што Ён – Сын Божы».

Разважанне да Божага слова

Ян Хрысціцель быў чалавекам, які пільна ўслухоўваўся ў голас Святога Духа. Бог даў яму місію і ласку распазнаць, што Езус сапраўды Сын Божы.

У Евангеллі паводле Яна (14:21) Езус абяцае, што аб'явіцца нам. Памолімся аб ласцы быць адкрытымі на выкананне гэтага абяцання праз нашу вернасць штодзённай шчырай малітве.

Размова

Якія пачуцці, пытанні, сумненні ці натхненні выклікала ўва мне сённяшняе Евангелле? Аддаю Езусу ўсё, што адчуваю і думаю, ведаючы, што Ён сапраўды са мной быў, ёсць і будзе.

Заканчэнне

Я дзякую Богу за магчымасць правесці сам-насам з Ім некалькі хвілін,
і цяпер іду далей з радасцю і надзеяй
служыць Яго народу.

Амэн