Прысутнасць

Раблю паўзу перад тым, як увайсці ў малітву,
і думаю пра любоў і шматлікія ласкі,
якімі Бог абсыпае мяне,
ствараючы мяне паводле вобраза і падабенства Свайго,
будуючы мяне як Сваю святыню…

Свабода

Многія краіны ў гэты момант пакутуюць ад жахаў вайны. Схіляю галаву ў знак падзякі за сваю свабоду. Малюся за вязняў, палонных і ўсіх, каго закранула вайна.

Усведамленне

Нябесны Ойча, дазволь мне ўзрастаць у цноце, слухаючы Цябе і прабываючы з Табой. Няхай Твая дабрыня перапаўняе маё жыццё і пераліваецца з майго жыцця ў жыццё ўсіх тых, каго я сустракаю.

Божае слова

¹⁴Пасля таго, як выдалі Яна, прыйшоў Езус у Галілею, прапаведуючы Евангелле Божае ¹⁵і кажучы: «Споўніўся час, і наблізілася Валадарства Божае; кайцеся і верце ў Евангелле».

¹⁶Праходзячы каля Галілейскага мора, убачыў Сымона і Андрэя, брата Сымона, якія закідвалі сеткі ў мора, бо яны былі рыбакамі. ¹⁷Езус сказаў ім: «Ідзіце за Мной, і Я зраблю вас рыбакамі людзей». ¹⁸Яны, пакінуўшы сеткі, адразу пайшлі за Ім. ¹⁹Адышоўшы крыху далей, Ён убачыў Якуба Зэбэдэевага і Яна, брата ягонага, якія таксама былі ў чоўне і ладзілі сеткі. ²⁰І адразу паклікаў іх. Яны, пакінуўшы бацьку свайго Зэбэдэя ў чоўне з работнікамі, пайшлі за Ім.

Разважанне да Божага слова

Езус заўсёды ведаў, што для плённасці місіі Яму спатрэбіцца супольнасць паслядоўнікаў, якія стануць Яго адданымі паплечнікамі і будуць слухаць Яго і вучыцца, быць пры Ім, назіраць і пераймаць тое, што Ён робіць. Чацвёра, пакліканых у гэтым Евангеллі, ужо сустракаліся з Ім і чулі Яго. Андрэй, правёўшы з Ім цэлы дзень, прывёў свайго брата Пятра. Ён выказаўся коратка і дакладна: «Мы знайшлі Месію».

Яны былі простымі рыбакамі, але павінны былі стаць у свеце апосталамі. Для Бога няма нічога немагчымага. У Евангеллі паводле Яна чытаем: «Не вы Мяне выбралі, але Я выбраў вас і прызначыў, каб вы ішлі і прыносілі плён». Папросім сёння Пана, каб нашае жыццё змяняла жыццё іншых людзей да лепшага.

Размова

Зараз я ўяўляю перад сабой адну з Асобаў Тройцы, Айца, Сына ці Святога Духа, хто прыйдзе ва ўяўленне найбольш натуральным чынам, і вяду сардэчную размову аб сённяшнім фрагменце Пісання або падзях майго жыцця, якія хвалююць мяне ў гэты момант.

Заканчэнне

Напоўнены любячай прысутнасцю Бога,
Я прашу Яго благаславіць мяне і накіроўваць мае крокі
у спаўненні Яго волі і супрацоўніцтве з Яго ласкай у сваім штодзённым жыцці.

Амэн