Прысутнасць

Супакой Божы — гэта скарб са скарбаў, «каштоўная пярліна». Пане, дай мне спазнаць гэты супакой зараз, у Тваёй святой прысутнасці.

Свабода

«Тоўстае і бясформеннае бервяно
ніколі не паверыла б, што можа стаць статуяй,
якой будуць захапляцца як цудам скульптуры,
і ніколі не скарылася б разцу скульптара,
які дзякуючы свайму генію бачыць, што з яго можна зрабіць» (Святы Ігнацый).
Прашу аб ласцы, каб дазволіць любячаму Стварыцелю фармаваць мяне.

Усведамленне

Езу, Ты заўсёды тут, чакаеш мяне.
Дай мне часцей знаходзіць цішыню і спакой,
каб прагнуць праводзіць час у Тваёй прысутнасці,
каб зведацьТвой супакой, Тваю любоў.

Божае слова

⁴⁰Вось прыйшоў да Яго пракажоны і, упаўшы на калені, прасіў Яго, кажучы: «Калі хочаш, можаш мяне ачысціць». ⁴¹Злітаваўшыся над ім, Ён працягнуў руку, дакрануўся да яго і сказаў яму: «Хачу, будзь ачышчаны!» ⁴²І адразу сышла з яго праказа, і ён стаў чысты. ⁴³Езус сурова звярнуўся да Яго і зараз жа адправіў. ⁴⁴І cказаў яму: «Глядзі, нікому нічога не кажы, але ідзі, пакажыся святару і прынясі ахвяру за сваё ачышчэнне, як загадаў Майсей, на сведчанне ім». ⁴⁵Але той, выйшаўшы, пачаў шмат абвяшчаць і расказваць пра здарэнне, так што Езус не мог ужо адкрыта ўвайсці ў горад, а заставаўся звонку, у пустынных мясцінах. І прыходзілі да Яго адусюль.

Разважанне да Божага слова

Езус заўсёды глыбока краналі цярпенні людзей. Пры сустрэчы з пракажоным Ён працягвае руку, дакранаецца да недатыкальнага, аздараўляе яго.

Пане Езу, Твой позірк поўны спагады. Адно прабыванне ў Тваёй прысутнасці прыносіць ацаленне цела і розуму. Дапамажы нам цяпер быць тваімі вачамі і рукамі, якія імкнуцца дапамагаць іншым.

Размова

Езу, Ты заўсёды сардэчна вітаў маленькіх дзяцей, калі хадзіў па гэтай зямлі.
Навучы мяне мець дзіцячы давер да Цябе,
памятаючы, што Ты ніколі не пакінеш мяне.

Заканчэнне

Дзякую, Пане, за дар часу, праведзенага ў Тваёй прысутнасці і за ўсе Твае натхненні.

Амэн