Прысутнасць

У пачатку сённяшняй малітвы звярну ўвагу на сваё дыханне, якое з’яўляецца для мяне Божым дарам, які падтрымлівае жыццё. Адну-дзве хвіліны дыхаю больш павольна, глыбока і спакойна.

Свабода

Пане, дай мне ласку вызваліцца ад усяго лішняга. Не дазволь прагнасці злавіць мяне ў сваю пастку. Захавай маё сэрца і розум свабоднымі, каб любіць Цябе і служыць Табе.

Усведамленне

Калі я тут з Табой, Пане,
я ўсведамляю, колькі благаслаўленняў Ты мне даеш.
Думаю пра любоў і ласкі ў маім жыцці,
і адчуваю ўдзячнасць.

Божае слова

¹Езус зноў увайшоў у сінагогу. А быў там чалавек з усохлай рукой. ²І сачылі за Езусам, ці вылечыць Ён у шабат, каб абвінаваціць Яго. ³І сказаў Ён чалавеку з усохлай рукою: «Стань пасярэдзіне». ⁴А ў іх запытаўся: «У шабат дазволена рабіць дабро ці зло, душу ўратаваць ці загубіць?» Але яны маўчалі. ⁵Гнеўна паглядзеўшы на іх, засмучаны жорсткасцю іх сэрцаў, сказаў таму чалавеку: «Працягні руку». Той працягнуў — і стала здаровай рука ягоная. ⁶Тады фарысеі выйшлі, адразу сабралі з прыхільнікамі Ірада нараду супраць Езуса, каб загубіць Яго.

Разважанне да Божага слова

Ва ўсіх сцэнах аздараўлення фарысеі, здаецца, ніколі не выказваюць спагады да церпячага. Для іх хворыя – грэшнікі, якія заслужылі сваю хваробу. Але Езус не дазваляе, каб іх вузкае мысленне перашкодзіла Яму рабіць дабро. А мы – ці не дазваляем часам нечаму крытычнаму стаўленню перашкаджаць нам любіць і дапамагаць патрабуючым?

Памолімся аб мужнасці паступаць правільна і ісці за сваім сумленнем, незалежна ад таго, што пра нас падумаюць іншыя.

Размова

Добры Езу, я магу адкрыць Табе сэрца.
Магу сказаць Табе ўсё, што мяне турбуе.
Я ведаю, што Цябе хвалююць усе мае клопаты.
Навучы мяне жыць, не забываючыся,
што Ты ахінаеш мяне апекай сёння
і будзеш клапаціцца заўтра і ва ўсе дні жыцця майго.

Заканчэнне

Напоўнены любячай прысутнасцю Бога,
Я прашу Яго благаславіць мяне і накіроўваць мае крокі
у спаўненні Яго волі і супрацоўніцтве з Яго ласкай у сваім штодзённым жыцці.

Амэн