Прысутнасць

“Ты дарогу жыцця мне пакажаш, паўната радасці перад Табою, вечнае шчасце праваруч Цябе” (Пс 16 (15), 11). Пане, дапамажы мне жыць у Тваёй прысутнасці.

Свабода

Пане, я малюся аб Тваім дары свабоды.
Няхай Твой Святы Дух
вядзе тых, хто ва ўладзе, працаваць дзеля
сапраўднай справядлівасці для ўсяго Божага народу.

Усведамленне

Дзе ў сваім жыцці я адчуваю надзею, заахвочванне і бачу перспектывы росту? Прыгадваючы мінулыя некалькі месяцаў, ці не адчуваю я, якая дзейнасць і якія падзеі прыносілі багаты плён? Калі так, то прымаю рашэнне прысвячаць ім больш часу у будучыні.

Божае слова

⁷Езус адышоў з вучнямі сваімі да мора. А за Ім ішоў вялікі натоўп з Галілеі, з Юдэі, ⁸з Ерузалема, з Ідумеі; з-за Ярдана і з ваколіц Тыра і Сідона прыйшло да Яго вялікае мноства людзей, якія пачулі, што Ён рабіў. ⁹Тады сказаў Ён сваім вучням падрыхтаваць Яму човен, каб натоўп не заціснуў Яго. ¹⁰Многіх Ён аздаравіў, таму тыя, хто меў якую-небудзь хваробу, ціснуліся, каб дакрануцца да Яго. ¹¹Нячыстыя духі, калі бачылі Яго, падалі перад Ім і крычалі: «Ты — Сын Божы!» ¹²Але Ён строга забараняў ім, каб не выкрывалі Яго.

Разважанне да Божага слова

Тыя, хто выконвае нейкае служэнне, добра ведаюць, наколькі патрабавальнай можа быць грамадскасць. Езус не шкадуе сябе, калі натоўп ціснецца да Яго са сваімі патрэбамі. Малітва, аўтарам якой лічаць св.Ігнацыя, гучыць так: «даваць, не лічачы коштаў; змагацца, не зважаючы на раны, аддаваць усе сілы, не шукаючы адпачынку, працаваць, не чакаючы ўзнагароды, акрамя ўсведамлення, што я выконваю Тваю волю».

Людзі бачылі моц Езуса і шукалі з Ім кантакту. Мы таксама ў сваіх нягодах і патрэбах можам звярнуцца да Яго праз поўную веры малітву.

Размова

Як Божае Слова ўзрушыла мяне?
Ці пакінула адчуванне сухасці?
Суцешыла мяне ці падштурхнула дзейнічаць па-новаму?
Я ўяўляю Езуса, які стаіць ці сядзіць побач са мной
Я дзялюся з Ім сваімі пачуццямі.

Заканчэнне

Хвала Айцу і Сыну, і Духу Святому.
як было спрадвеку,
цяпер і заўсёды,
і навекі вечныя. Амэн.

Амэн