Прысутнасць

Пане, калі я адчуваю сябе самотным,
нагадай мне пра Тваё абяцанне:
“Ты ніколі не самотны,
Я заўсёды з табой,
так, да канца вякоў” (Мц 28:20).

Свабода

Пане, дай мне ласку вызваліцца ад усяго лішняга. Не дазволь прагнасці злавіць мяне ў сваю пастку. Захавай маё сэрца і розум свабоднымі, каб любіць Цябе і служыць Табе.

Усведамленне

Часам клопаты гэтага свету ахопліваюць мяне.
У такія хвіліны дазволь мне памятаць
пра раскошу Тваёй прысутнасці,
Тваёй бясконцай любові да мяне.

Божае слова

²¹І казаў ім: «Ці для таго прыносяць светач, каб паставіць яго пад пасудзіну або пад ложак? Ці ўсё ж для таго, каб паставіць яго на свечніку? ²²Бо няма нічога схаванага, што б ні адкрылася, і няма нічога таемнага, што б ні выявілася. ²³Хто мае вушы, каб слухаць, няхай слухае». ²⁴І сказаў ім: «Зважайце на тое, што чуеце. Якой мераю мераеце, такой і вам будзе адмерана, і яшчэ дададзена будзе вам. ²⁵Бо хто мае, таму дадзена будзе, а хто не мае, у таго адымецца і тое, што мае».

Разважанне да Божага слова

Езус заклікае слухаць Яго словы са шчырай адкрытасцю. Хтосьці заўважыў, што мова Бога – маўчанне і любоў. Ці задаволены мы тым, што прабываем у Яго прысутнасці і слухаем, як Ён любіць нас тут і цяпер? Калі не знаходзім слоў, каб выказаць сябе, няхай Пан прамовіць да нас: «Мне не патрэбны твае словы. Я хачу проста тваёй прысутнасці і любові».

Святы Павел нагадвае, што «вы ззяеце, як светачы ў свеце». Святая Тэрэза з Лізьё пісала пра «малітву, якая запальвае агонь любові». Дзякуючы ласцы Божай, мы можам сваім жыццём сведчыць пра святло і любоў Езуса Хрыста.

Размова

“Ён паглядзеў на яго з любоўю”. (Мк 10:21). Паспрабую пасядзець пад поўным любові позіркам Езуса, які любіць мяне ва ўсе часы і месцы, ва ўсіх абставінах. Бог заўсёды глядзіць на мяне з безумоўнай любоўю.

Заканчэнне

Напоўнены любячай прысутнасцю Бога,
Я прашу Яго благаславіць мяне і накіроўваць мае крокі
у спаўненні Яго волі і супрацоўніцтве з Яго ласкай у сваім штодзённым жыцці.

Амэн