Прысутнасць

“Супакойцеся і ведайце, што Я – Бог”. (Пс 46:10)
Пане, няхай Твой Дух вядзе мяне,
шукаць Тваёй Любячай прысутнасці
больш і больш. Таму што ў ёй
я знаходжу адпачынак і аднаўляю сілы
ў гэтым напружаным свеце.

Свабода

З Божай ласкі я нарадзіўся/нарадзілася, каб жыць у свабодзе,
атрымліваць асалоду ад дабротаў, якія Ён стварыў для мяне.
О Пане, дай мне жыць паводле Тваёй задумы,
напоўніцу давяраючы Тваёй любові.

Усведамленне

Калі я тут з Табой, Пане,
я ўсведамляю, колькі благаслаўленняў Ты мне даеш.
Думаю пра любоў і ласкі ў маім жыцці,
і адчуваю ўдзячнасць.

Божае слова

³²Калі любіце тых, хто любіць вас, якая вам за гэта падзяка? Бо грэшнікі таксама любяць тых, хто іх любіць. ³³Калі чыніце дабро тым, хто вам чыніць дабро, якая вам за тое падзяка? І грэшнікі робяць тое самае. ³⁴Калі пазычаеце тым, ад каго спадзяецеся атрымаць назад, якая вам за тое падзяка? Бо і грэшнікі пазычаюць грэшнікам, каб атрымаць столькі ж. ³⁵Але вы любіце ворагаў вашых, рабіце дабро і пазычайце, не чакаючы нічога ўзамен, а ўзнагарода вашая будзе вялікая, і будзеце вы сынамі Найвышэйшага, бо Ён ласкавы да няўдзячных і да злых. ³⁶Будзьце міласэрнымі, як і Айцец ваш міласэрны.

³⁷Не судзіце, і не будуць судзіць вас; не асуджайце, і не будуць асуджаць вас; прабачайце, і прабачаць вам. ³⁸Давайце, і будзе дадзена вам: меру добрую, уціснутую, утрэсеную і з верхам адсыплюць вам у падол ваш. Бо якой мераю мераеце, такой і вам будзе адмерана».

Разважанне да Божага слова

Які патрабавальны Езус у першай частцы гэтага ўрыўка! Маё сэрца мае павялічвацца, пакуль не стане такім шырокім, як сэрца самога Езуса. Калі я хрысціянін, то не павінен нікога лічыць ворагам. Але, гледзячы на Бога, павінен мець у сэрцы месца для ўсіх. Шчыра малюся аб гэтай ласцы, якая выходзіць далёка за межы маіх чалавечых магчымасцяў.

Але які міласэрны Езус у другой частцы Евангелля! Паколькі Бог ніколі не залічвае мне грахі, каб асудзіць мяне, я не павінен залічваць правіны іншых. Мне не трэба турбавацца аб сваіх грахах і памылках, калі я дарую тым, хто мяне крыўдзіць.

Размова

Добры Езу, я магу адкрыць Табе сэрца.
Магу сказаць Табе ўсё, што мяне турбуе.
Я ведаю, што Цябе хвалююць усе мае клопаты.
Навучы мяне жыць, не забываючыся,
што Ты ахінаеш мяне апекай сёння
і будзеш клапаціцца заўтра і ва ўсе дні жыцця майго.

Заканчэнне

Напоўнены любячай прысутнасцю Бога,
Я прашу Яго благаславіць мяне і накіроўваць мае крокі
у спаўненні Яго волі і супрацоўніцтве з Яго ласкай у сваім штодзённым жыцці.

Амэн