Прысутнасць

“Ты дарогу жыцця мне пакажаш, паўната радасці перад Табою, вечнае шчасце праваруч Цябе” (Пс 16 (15), 11). Пане, дапамажы мне жыць у Тваёй прысутнасці.

Свабода

Дзякуй, Пане, што маю свабоду.
Няхай жа я здолею выкарыстаць гэты дар, каб рабіць тое, што магу,
для прыгнечаных і абцяжараных людзей.

Усведамленне

Ойча, дзякую Табе за тое, што паслаў Твайго Сына на зямлю, каб Ён быў са мной у кожным досведзе. Дзякуй, што Ён асаблівым чынам са мной у гэты час малітвы – праз Тваё Слова.

Божае слова

²⁷“ Але кажу вам, хто слухае: любіце ворагаў вашых, дабро рабіце тым, хто вас ненавідзіць. ²⁸ Благаслаўляйце тых, хто вас праклінае, маліцеся за тых, хто вас крыўдзіць. ²⁹ Таму, хто ўдарыў цябе па шчацэ, падстаў і другую; і таму, хто адбірае ў цябе плашч, не забараняй узяць і кашулю. ³⁰ Кожнаму, хто просіць у цябе, давай, і ад таго, хто ўзяў тваё, не дамагайся звароту. ³¹ Як хочаце, каб рабілі вам людзі, так вы ім рабіце.
.

³² Калі любіце тых, хто любіць вас, якая вам за гэта падзяка? Бо грэшнікі таксама любяць тых, хто іх любіць. ³³ Калі чыніце дабро тым, хто вам чыніць дабро, якая вам за тое падзяка? І грэшнікі робяць тое самае. ³⁴ Калі пазычаеце тым, ад каго спадзяецеся атрымаць назад, якая вам за тое падзяка? Бо і грэшнікі пазычаюць грэшнікам, каб атрымаць столькі ж.³⁵ Але вы любіце ворагаў вашых, рабіце дабро і пазычайце, не чакаючы нічога ўзамен, а ўзнагарода вашая будзе вялікая, і будзеце вы сынамі Найвышэйшага, бо Ён ласкавы да няўдзячных і да злых. ³⁶ Будзьце міласэрнымі, як і Айцец ваш міласэрны.

³⁷ Не судзіце, і не будуць судзіць вас; не асуджайце, і не будуць асуджаць вас; прабачайце, і прабачаць вам. ³⁸ Давайце, і будзе дадзена вам: меру добрую, уціснутую, утрэсеную і з верхам адсыплюць вам у падол ваш. Бо якой мераю мераеце, такой і вам будзе адмерана».

Разважанне да Божага слова

Жыць хрысціянскай верай заўсёды азначае выклік і змаганне. Мы пакліканы імкнуцца любіць так, як любіць Нябесны Айцец, і быць дасканалымі, а менавіта – быць міласэрнымі і не асуджаць іншых. Гэта падсумоўваецца ў залатым правіле: ставіцца да іншых так, як мы хацелі б, каб яны ставіліся да нас. Нам неабходна заўсёды памятаць пра прыклад Езуса, які маліўся на крыжы за сваіх катаў: «Ойча, прабач ім». Ёсць над чым паразважаць у кантэксце свайго жыцця і ёсць пра што паразмаўляць з Панам у малітве.

Размова

Божае Слова заўсёды плённае.
Ці гэта актуальна для мяне цяпер,
калі гляджу на тое, як прайшла малітва?
Ці адчуваю суцяшэнне?
Ці былі нейкія цяжкасці і выклікі?

Заканчэнне

Напоўнены любячай прысутнасцю Бога,
Я прашу Яго благаславіць мяне і накіроўваць мае крокі
у спаўненні Яго волі і супрацоўніцтве з Яго ласкай у сваім штодзённым жыцці.

Амэн