Прысутнасць

“Свет прасякнуты веліччу Бога” (Джэралд Мэнлі Хопкінс)
Некаторы час затрымаюся ў прысутнасці Бога навокал і ўва мне,
у кожнай часцінцы майго цела
і глыбока ў сэрцы.

Свабода

Пане, дапамажы мне адпусціць неспакой, крыўды і страхі,
якія часам так неадчэпна ходзяць за мной.
Дазволь мне адкрыць рукі і сэрца, каб свабодна прыняць
усе дары, неабходныя мне ў гэты час.

Усведамленне

Як я сябе адчуваю? У добрым настроі? Або прыгнечаным?
Магчыма, мне цяпер добра быць тут.
Аднак, можа быць і так, што ўваходжу ў гэты час малітвы расчараваным, заклапочаным або нават раззлаваным.
Прызнаю перад Панам, што са мной дзеецца на самой справе. Вось такога, сапраўднага, мяне любіць Пан.

Божае слова

⁷Калі моліцеся, не гаварыце шмат, як язычнікі, бо яны думаюць, што ў мнагаслоўі сваім будуць пачутыя. ⁸Не будзьце ж падобнымі да іх, бо ведае Айцец ваш, у чым вы маеце патрэбу, раней, чым вы папросіце ў Яго.

⁹Таму вы так маліцеся:

Ойча наш, каторы ёсць у небе, свяціся імя Тваё,

¹⁰прыйдзі Валадарства Тваё, будзь воля Твая, як у небе, так і на зямлі. ¹¹Хлеба нашага штодзённага дай нам сёння^{, 12}і адпусці нам правіны нашы, як і мы адпускаем вінаватым нашым. ¹³ І не ўводзь нас у спакусу, але збаў нас ад злога.^,

¹⁴Калі вы будзеце адпускаць людзям правіны іхнія, то Айцец ваш Нябесны адпусціць і вам. ¹⁵А калі не будзеце адпускаць людзям, то і Айцец ваш не адпусціць вам правінаў вашых.

Разважанне да Божага слова

Малітва – не проста чытанне слоў, незалежна ад таго, колькі раз іх паўтараюць. Малітва – наладжанасць сэрца на Бога. У Ісаі мы чытаем: «Людзі гэтыя шануюць Мяне вуснамі, а сэрца іх далёка ад Мяне». Самае важнае, што мы можам рабіць у малітве, – любіць. А любіць можна нават без слоў у маўклівым пакланенні.

У малітве «Ойча наш» Езус вучыць нас правільнаму падыходу да малітоўнага звароту: Бог займае цэнтральнае месца ў нашым жыцці, мы ад сэрца прабачаем іншым, просім Яго клапаціцца пра нас і абараняць. Аснова духоўных практыкаванняў святога Ігнацыя пачынаецца так: «Чалавек створаны, каб хваліць Бога, нашага Пана, шанаваць Яго і служыць Яму, і праз гэта збавіць сваю душу».

Размова

Ці заўважаю, як рэагую на малітву Словам Божым?
Ці адчуваю занепакоенасць, суцяшэнне, гнеў?
Уяўляючы Езуса, які сядзіць ці стаіць побач са мной,
выказваю свае пачуцці, як добраму сябру.

Заканчэнне

Напоўнены любячай прысутнасцю Бога,
Я прашу Яго благаславіць мяне і накіроўваць мае крокі
у спаўненні Яго волі і супрацоўніцтве з Яго ласкай у сваім штодзённым жыцці.

Амэн