Прысутнасць

Душа мая прагне Тваёй прысутнасці, Пане. Калі я скіроўваю свае думкі да Цябе, я знаходжу спакой і суцяшэнне.

Свабода

Пане, занадта часта я думаю, што самастойна кантралюю сваё жыццё.
Дапамажы мне ўсвядоміць бяссілле перад многімі рэчамі.
Дай ласку і здольнасць аддаць Табе сваё жыццё
і адчуць радасць гэтай свабоды.

Усведамленне

Падумаю, як сябе адчуваю.
Ці стомлены мацней, чым звычайна, напружаны або знерваваны?
Калі штосьці падобнае адбываецца,
паспрабую на час малітвы выпусціць з увагі клопаты, якія мяне турбуюць.

Божае слова

²⁹Калі стаў збірацца народ, Ён пачаў гаварыць: «Пакаленне гэтае — ліхое пакаленне, яно шукае знаку, але не будзе дадзена яму знаку, апроч знаку Ёны. ³⁰Бо як Ёна стаў знакам для нінівіцянаў, так будзе і Сын Чалавечы для гэтага пакалення. ³¹Каралева Поўдня ўстане на судзе з людзьмі гэтага пакалення і асудзіць іх, бо яна прыйшла з краю зямлі паслухаць мудрасці Саламонавай, і вось, тут большае за Саламона. ³²Мужы Нінівы ўстануць на судзе з гэтым пакаленнем і асудзяць яго, бо яны раскаяліся дзякуючы прапаведаванню Ёны, і вось, тут большае за Ёну.

Разважанне да Божага слова

Сёння людзі ўсё яшчэ будуць збірацца, каб убачыць знешнія знакі і цуды, але сапраўдным знакам для ўсіх хрысціян заўсёды будзе постаць Хрыста на крыжы. «Як Майсей узняў змея ў пустыні, так павінен быць узняты Сын Чалавечы» (Ян 3, 14). І «Я, калі буду ўзняты над зямлёю, усіх прыцягну да сябе» (Ян 12, 32). Езус хоча, каб мы памяталі Яго менавіта такім. Калі Ён сказаў на Апошняй Вячэры: «Гэта чыніце на Маю памяць», то хацеў, каб мы ўзгадвалі Ягоную жыватворную ахвяру на крыжы.

Сапраўды, тут ёсць штосьці большае за Саламона. Пачынаючы кожную малітву, мы адказваем на запрашэнне на прыватную аўдыенцыю да кагосьці большага, чым хто-небудзь іншы на планеце.

Размова

Якое слова ці выраз з сённяшняга Евангелля прыцягнулі маю ўвагу? Прашу Пана адкрыць мне, што Ён хоча сказаць мне гэтым словам…

Заканчэнне

Я дзякую Богу за магчымасць правесці сам-насам з Ім некалькі хвілін,
і цяпер іду далей з радасцю і надзеяй
служыць Яго народу.

Амэн