Прысутнасць

Калі я прыходжу да Цябе, Пане,
Я ведаю, што знаходжуся ў прысутнасці майго Стварыцеля.
Ты стварыў мяне з любові.
Ты ведаеш нават, колькі валасоў у мяне на галаве.
Твая прысутнасць, о Пане, – найвялікшы дар.

Свабода

Пане, дай мне ласку вызваліцца ад усяго лішняга. Не дазволь прагнасці злавіць мяне ў сваю пастку. Захавай маё сэрца і розум свабоднымі, каб любіць Цябе і служыць Табе.

Усведамленне

Ведаючы, што Бог любіць мяне безумоўна,
Шчыра праглядаю мінулы дзень, падзеі, пачуцці.
За што я маю быць удзячным? Дзякую Пану.
За якія думкі, словы і ўчынкі я адчуваю жаль? Прашу прабачэння за гэта.

Божае слова

⁷Прасіце, і будзе дадзена вам; шукайце, і знойдзеце; стукайце, і адчыняць вам.
⁸Бо кожны, хто просіць, атрымлівае; і хто шукае, знаходзіць; і хто стукае, таму будзе адчынена.
⁹Ці ёсць сярод вас чалавек, які, калі сын ягоны папросіць у яго хлеба, дасць яму камень? ¹⁰Або калі папросіць у яго рыбы, дасць яму змяю? ¹¹Калі ж вы, будучы ліхімі, ведаеце, як даваць дзецям вашым добрыя дары, тым больш Айцец ваш, які ў нябёсах, дасць добрае тым, хто просіць у Яго.

¹²Усё, што хочаце, каб рабілі вам людзі, і вы ім рабіце, бо ў гэтым Закон і Прарокі.

Разважанне да Божага слова

Менавіта з самымі глыбокімі жаданнямі нашых сэрцаў мы павінны шчыра звяртацца да Бога ў малітве. Прасіць, шукаць, стукацца ў дзверы. Ён заўсёды пачуе гэтыя малітвы і адкажа так, як лепш для нас. «Будзеце шукаць Мяне і знойдзеце, калі будзеце шукаць Мяне ўсім сэрцам» (Ер 29:13). Наш Нябесны Айцец паклапоціцца пра нас.

Ва ўсім рабі іншым так, як хочаш, каб рабілі табе. Мы справядліва называем гэта залатым правілам, і яно яшчэ раз нагадвае нам, што нашы адносіны з Богам заўсёды звязаны з нашымі адносінамі з людзьмі. Мы пакліканы жыць тым, як молімся, і маліцца тым, чым жывём.

Размова

З сапраўды блізкімі сябрамі не заўсёды патрэбны словы
Калі ўяўляю сябе поруч з Езусам…
і гляджу на Яго, а Ён на мяне…
…як я сябе адчуваю?

Заканчэнне

Дзякую, Пане, за дар часу, праведзенага ў Тваёй прысутнасці і за ўсе Твае натхненні.

Амэн