Прысутнасць

Пане, дапамажы мне быць па-сапраўднаму жывым для Тваёй Святой прысутнасці. Ахіні мяне любоўю. Няхай маё сэрца будзе злучана з Тваім.

Свабода

Пане, ахвярую Табе – як святы Ігнацый – сваю памяць, розум,
усю сваю волю. Усё, чаго я прашу ў адказ, гэта Тваёй любові і Тваёй ласкі – і мне хопіць.

Усведамленне

Калі я размаўляю з Табою, Божа,
дапамажы мне ўзрастаць ва ўдзячнасці за дар камунікацыі.
Учыні так, каб я гаварыў за тых, хто не мае голасу
і заўсёды меў добрае слова для людзей у патрэбе.

Божае слова

²⁰ Бо кажу вам, калі справядлівасць ваша не пераўзыдзе справядлівасці кніжнікаў і фарысеяў, то вы не ўвойдзеце ў Валадарства Нябеснае.

²¹Вы чулі, што было сказана продкам: “Не забівай”, а хто заб’е, падлягае суду. ²²22 А Я кажу вам, што кожны, хто гневаецца на брата свайго, падлягае суду. Хто ж скажа брату свайму “рака”, падлягае Сінэдрыёну, а хто скажа “неразумны”, падлягае геене вогненнай. ²³Таму, калі прынясеш дар свой да ахвярніка і ўспомніш там, што брат твой мае нешта супраць цябе, ²⁴пакінь дар свой перад ахвярнікам і ідзі спачатку памірыся з братам сваім, а тады прыйдзі і прынясі свой дар. ²⁵Мірыся з праціўнікам тваім хутка, пакуль ты з ім яшчэ ў дарозе, каб праціўнік не аддаў цябе суддзі, а суддзя не аддаў цябе слугу, і каб не ўкінулі цябе ў вязніцу. ²⁶Сапраўды кажу табе: не выйдзеш адтуль, пакуль не аддасі апошні грош.

Разважанне да Божага слова

Езус прыйшоў не для таго, каб адмяніць закон, але каб удасканаліць яго. Ён прамаўляе з новай уладай, якая вынікае з таго, што Ён пасланы Айцом. У новым стварэнні Валадарства Божага стандарты правільных паводзін сапраўды пастаўлены на высокім узроўні. «Будзьце дасканалымі, як дасканалы Айцец ваш Нябесны».

Езус прыйшоў, каб прынесці супакой і прымірэнне ўсім людзям. Калі мы не прабачым, не будзем прабачаны. Ідучы маліцца разам з іншымі, трэба быць у згодзе з імі і прымірыцца ў сэрцы з тымі, хто пакрыўдзіў нас. Наколькі я ўсведамляю, што мы ідзем пакланяцца Богу як народ і што мы збаўлены як народ?

Размова

Як Божае Слова ўзрушыла мяне?
Ці пакінула адчуванне сухасці?
Суцешыла мяне ці падштурхнула дзейнічаць па-новаму?
Я ўяўляю Езуса, які стаіць ці сядзіць побач са мной
Я дзялюся з Ім сваімі пачуццямі.

Заканчэнне

Дзякую, Пане, за дар часу, праведзенага ў Тваёй прысутнасці і за ўсе Твае натхненні.

Амэн