Прысутнасць

У пачатку сённяшняй малітвы звярну ўвагу на сваё дыханне, якое з’яўляецца для мяне Божым дарам, які падтрымлівае жыццё. Адну-дзве хвіліны дыхаю больш павольна, глыбока і спакойна.

Свабода

“Я свабодны чалавек”.
Калі гляджу цяпер на гэтыя словы,
яны нібы выклікаюць ува мне пачуццё трымцення.
Так, пачуццё свабоды цудоўнае.
Дзякую Табе, Божа.

Усведамленне

Езу, дзякую Табе за гэты момант, калі я адчуваю Тваю прысутнасць. Дапамажы мне ўзрастаць ва ўважнасці на Тваю прысутнасць у штодзённым жыцці і ў іншых людзях.

Божае слова

¹Пасля гэтага было юдэйскае свята, і Езус прыйшоў у Ерузалем.

²Ёсць жа ў Ерузалеме каля Авечай брамы купальня, якая па-габрэйску называецца Бэтэзда і якая мае пяць портыкаў. ³У іх ляжала мноства хворых, сляпых, кульгавых, паралізаваных. ⁵Быў там адзін чалавек, які хварэў трыццаць восем гадоў. ⁶Езус, убачыўшы яго ляжачым і пазнаўшы, што ён хварэе ўжо доўгі час, сказаў яму: «Хочаш стаць здаровым?» ⁷Хворы адказаў Яму: «Пане, я не маю чалавека, які апусціў бы мяне ў купальню, калі ўзварушыцца вада. Пакуль я іду, іншы ўжо сыходзіць перада мною». ⁸Кажа яму Езус: «Устань, вазьмі насілкі свае і хадзі». ⁹І адразу выздаравеў той чалавек, узяў насілкі свае і пайшоў.

А быў у гэты дзень шабат.

¹⁰Таму сказалі юдэі аздароўленаму: «Сёння шабат, і табе не дазваляецца браць ложа тваё». ¹¹Ён адказаў ім: «Той, хто аздаравіў мяне, сказаў мне: “Вазьмі ложа сваё і хадзі”». ¹²Спыталіся ў яго: «Хто той чалавек, які сказаў табе: “Вазьмі і хадзі?”»¹³Але аздароўлены не ведаў, хто гэта, бо Езус знік у натоўпе, які быў у тым месцы. ¹⁴ Пасля таго знайшоў яго Езус у святыні і сказаў яму: «Вось, ты выздаравеў. Не грашы больш, каб нездарылася з табою чаго горшага». ¹⁵Чалавек гэты пайшоў і абвясціў юдэям, што гэта Езус аздаравіў яго. ¹⁶І таму юдэі пераследавалі Езуса, бо Ён зрабіў гэта ў шабат.

Разважанне да Божага слова

Той факт, што Езус спытаўся ў хворага, ці хоча ён вылечыцца, паказвае вялікую чуласць. Пражыўшы ў недзеяздольнасці амаль сорак гадоў, ён сутыкнецца са шматлікімі значнымі зменамі ў сваім жыцці, калі раптам выздаравее. Мы павінны быць асцярожнымі з тым, аб чым просім у малітве. За просьбай Езуса ў Аліўным садзе кожны раз гучала: «Няхай будзе не Мая, а Твая воля». Будзем прасіць Бога, каб даў нам тое, што на Яго думку лепшае для нас.

Тагачасныя рэлігійныя лідэры прынялі шмат законаў, якія, як яны сцвярджалі, прызначаны былі шанаваць Бога, але на самой справе давалі ім уладу і кантроль над жыццём людзей. Езус, ведаючы іх крывадушнасць, праігнараваў такія законы. Чалавечыя законы заўсёды павінны грунтавацца на любові і спачуванні дзеля агульнага дабра. У маіх адносінах з іншымі ці стаўлю я чалавечыя законы вышэй за дабро іншых? Ці ахінаю справядлівасць міласэрнасцю?

Размова

Як Божае Слова ўзрушыла мяне?
Ці пакінула адчуванне сухасці?
Суцешыла мяне ці падштурхнула дзейнічаць па-новаму?
Я ўяўляю Езуса, які стаіць ці сядзіць побач са мной
Я дзялюся з Ім сваімі пачуццямі.

Заканчэнне

Я дзякую Богу за магчымасць правесці сам-насам з Ім некалькі хвілін,
і цяпер іду далей з радасцю і надзеяй
служыць Яго народу.

Амэн