Прысутнасць

“Ведайце, што Пан ёсць Богам”. (Пс 100:3).
Пане, няхай Твой Дух вядзе мяне шукаць
Тваёй любячай прысутнасці ўсё больш і больш,
бо менавіта ў ёй я знаходжу адпачынак і сілы сярод штодзённай мітусні.

Свабода

Пане, Ты стварыў мяне для жыцця ў свабодзе. Няхай Твой Святы Дух вядзе мяне вольна крочыць за Табой. Укарані ў маім сэрцы жаданне пазнаваць і любіць Цябе з кожным днём усё больш.

Усведамленне

Нам усім трэба на нейкі час аддаляцца ад штодзённых клопатаў.
Мы ведаем, што нашае цела патрабуе адпачынку.
Калі мы прыходзім у прысутнасць Тваю, Пане,
то аднаўляем сэрца, розум і дух.

Божае слова

¹⁷А Езус адказаў юдэям: «Айцец Мой дзейнічае дагэтуль, і Я дзейнічаю». ¹⁸За гэта юдэі яшчэ больш намагаліся забіць Яго, бо Ён не толькі зняважыў шабат, але таксама называў Бога сваім Айцом, робячы сябе роўным Богу. Улада, дадзеная Айцом Сыну

¹⁹Тады Езус сказаў ім у адказ: «Сапраўды, сапраўды кажу вам: не можа Сын рабіць сам ад сябе нічога, калі б не бачыў Айца, які робіць. Бо што робіць Ён, тое таксама робіць Сын. ²⁰ Бо Айцец любіць Сына і паказвае Яму ўсё, што сам робіць, і пакажа Яму справы большыя за гэтыя, каб вы дзівіліся. ²¹Бо як Айцец уваскрашае мёртвых і ажыўляе, так і Сын ажыўляе тых, каго хоча. ²²Бо Айцец нікога не судзіць, але ўвесь суд аддаў Сыну, ²³каб усе шанавалі Сына, як шануюць Айца. Хто не шануе Сына, той не шануе Айца, які паслаў Яго. ²⁴Сапраўды, сапраўды кажу вам: хто слухае Маё слова і верыць у таго, хто паслаў Мяне, мае жыццё вечнае і не прыходзіць на суд, але перайшоў ад смерці да жыцця.

²⁵Сапраўды, сапраўды кажу вам: надыходзіць гадзіна і ўжо настала, калі мёртвыя пачуюць голас Сына Божага, і якія пачуюць, ажывуць. ²⁶Бо, як Айцец мае ў сабе жыццё, так і Сыну даў мець жыццё ў сабе. ²⁷І даў Яму ўладу вяршыць суд, бо Ён Сын Чалавечы. ²⁸Не здзіўляйцеся гэтаму, бо надыходзіць гадзіна, калі ўсе, хто ў магілах, пачуюць голас Ягоны, ²⁹і выйдуць, хто чыніў дабро, каб уваскрэснуць для жыцця, а хто рабіў зло, каб уваскрэснуць для асуджэння.

³⁰Я нічога не магу рабіць ад сябе. Як чую, так суджу, і суд Мой справядлівы, бо Я не шукаю сваёй волі, але волі таго, хто паслаў Мяне.

Разважанне да Божага слова

Евангелле паводле св. Яна, напісанае пасля астатніх трох Евангелляў, не мае сабе роўных у выяўленні боскасці Езуса і блізкіх адносін з Айцом. У канцы 20 раздзела Ян сцвярджае, што гэтае Евангелле было напісана, каб мы маглі паверыць, што Езус ёсць Месія і Сын Божы. Езус казаў, што заўсёды імкнуўся выконваць волю свайго Айца. І гэта заўсёды павінна быць і нашай мэтай.

Калі б Бог не трымаў кожнае імгненне нашага жыцця, мы б проста перасталі існаваць. Гэтая праца з'яўляецца працай усёй Тройцы, Айца, Сына і Святога Духа. «А ў вас і валасы на галаве ўсе палічаны». Памолімся, каб поўнасцю даверыцца нязменнай любові Бога да кожнага з нас.

Размова

Каб камунікаваць, нам не заўсёды трэба размаўляць.
Калі ўяўляю сябе поруч з Езусам…
і проста гляджу на Яго, а Ён на мяне…
…як я сябе адчуваю?

Заканчэнне

Я дзякую Богу за магчымасць правесці сам-насам з Ім некалькі хвілін,
і цяпер іду далей з радасцю і надзеяй
служыць Яго народу.

Амэн