Прысутнасць

“Свет прасякнуты веліччу Бога” (Джэралд Мэнлі Хопкінс)
Некаторы час затрымаюся ў прысутнасці Бога навокал і ўва мне,
у кожнай часцінцы майго цела
і глыбока ў сэрцы.

Свабода

Бог не чужы маёй свабодзе.
Наадварот, Дух удыхае жыццё ў самыя ўтоеныя жаданні,
далікатна падштурхоўвае мяне да ўсялякага дабра.
Прашу аб ласцы, каб дазволіць Духу агарнуць мяне.

Усведамленне

Як вядома, на ўсё ёсць свой час і месца.
Пане, дай мне заўсёды жадаць
вяртацца ў Тваю прысутнасць,
слухаць Тваё слова.

Божае слова

⁵²Юдэі спрачаліся паміж сабою, кажучы: «Як Ён можа даць нам есці сваё цела?» ⁵³Езус жа сказаў ім: «Сапраўды, сапраўды кажу вам: калі не будзеце спажываць Цела Сына Чалавечага і піць Крыві Ягонай, не будзеце мець у сабе жыцця. ⁵⁴Хто спажывае Маё Цела і п’е Маю Кроў, мае жыццё вечнае, і Я ўваскрашу яго ў апошні дзень. ⁵⁵Бо Цела Маё — праўдзівы спажытак, а Кроў Мая – праўдзівы напой. ⁵⁶Хто спажывае Маё Цела і п’е Маю Кроў, трывае ўва Мне, а Я ў ім. ⁵⁷Як паслаў Мяне Айцец, які жыве, а Я жыву прaз Айца, так і той, хто спажывае Мяне, будзе жыць праз Мяне. ⁵⁸Гэта той хлеб, які сышоў з неба, а не той, які елі айцы вашыя і памерлі. Хто спажывае гэты хлеб, будзе жыць навекі». ⁵⁹Гэта Ён сказаў у сінагозе, калі навучаў у Кафарнауме.

Разважанне да Божага слова

Для габрэяў прапанова з'есці Цела гэтага чалавека, калі яны хочуць увайсці ў жыццё вечнае, напэўна, была занадта вялікім выклікам. Езус кажа, што ўваскрасіць іх у апошні дзень. А паколькі адзін Бог можа гэта ўчыніць, таму, па іх логіцы, Езус блюзнерыць. Толькі вера ў тое, кім Ён ёсць, можа дазволіць нам прыняць яго Цела і Кроў у Эўхарыстыі.

Нашы душы павінны сілкавацца сапраўднай ежай і напоем Цела і Крыві Хрыста, каб мець Яго жыццё. Бог заўсёды прагне аддаць сябе нам.

Размова

Памятаючы, што я ў прысутнасці Бога,
уяўляю Езуса побач
і кажу ўсё, што цяпер маю на думцы і на сэрцы,
размаўляючы як сябра з сябрам.

Заканчэнне

Хвала Айцу і Сыну, і Духу Святому.
як было спрадвеку,
цяпер і заўсёды,
і навекі вечныя. Амэн.

Амэн