Прысутнасць

Я чую, як Пан ціха вымаўляе маё імя, запрашаючы ў малітву. Адпускаю ўсё, што перашкаджае засяродзіцца, і занурваюся ў благаславёную блізкасць Бога.

Свабода

Стараюся адпусціць хваляванні і турботы,
якія зараз абцяжарваюць мяне.
Аддаю ўсе свае клопаты ў Божыя рукі
– хаця б на гэтыя некалькі хвілін малітвы.

Усведамленне

Мы ўсе пілігрымы ў дарозе да Цябе, Пане.
Дай нам сузіраць Цябе на зямлі
і з Тваёй дапамогай ісці па Тваіх слядах.

Божае слова

¹²Яшчэ шмат чаго маю сказаць вам, але цяпер вам гэтага не знесці. ¹³Калі ж прыйдзе Ён, Дух праўды, навучыць вас усёй праўдзе. Бо не ад сябе будзе прамаўляць, а будзе казаць вам тое, што пачуе, і будучыню абвесціць вам. ¹⁴Ён уславіць Мяне, бо ад Майго возьме і абвесціць вам. ¹⁵Усё, што мае Айцец, гэта Маё. Таму Я сказаў вам, што з Майго возьме і абвесціць вам.

Разважанне да Божага слова

Першыя вучні Езуса, па сутнасці, былі простымі, неадукаванымі людзьмі. Мякка кажучы, ім цяжка было спасцігнуць Ягоныя словы. І дагэтуль нам усё яшчэ цяжка, спатрэбіліся стагоддзі навучання і бліскучыя розумы, каб растлумачыць і разгарнуць словы Езуса. Нам жыццёва патрэбна гарантыя Святога Духа, што Касцёл не памыляецца ў тым, чаму навучае. Падзякуем за дар Святога Духа, няхай Ён вядзе нас у праўдзе.

Размова

Дар маўлення – цудоўны дар.
Навучы мяне выкарыстоўваць гэты дар з дабрынёй.
Няхай я буду марудны да выказвання рэзкіх,
крыўдных, гнеўных і жорсткіх слоў.

Заканчэнне

Дзякую, Пане, за дар часу, праведзенага ў Тваёй прысутнасці і за ўсе Твае натхненні.

Амэн