Прысутнасць

Запавольваюся і думаю пра любоў
і ласку, якімі Бог ахінае мяне:
Я створаны паводле вобразу і падабенству Божаму;
у глыбіні майго сэрца жыве Бог .

Свабода

Пане, Ты даў мне вялікі дар свабоды.
У гэтыя часы, Пане, вызваляй мяне
ад любой формы расізму або нецярпімасці.
Нагадай мне, Пане, што ўсе мы роўныя
у Тваіх любячых вачах.

Усведамленне

Пане, дай мне заўсёды жадаць
быць з Табой.
Няхай я не забываюся на Тваю дабрыню.
Накіруй мяне і пакажы, як дзяліцца Тваімі благаслаўленнямі з іншымі.

Божае слова

³⁹Сабраўшыся, Марыя ў тыя дні паспяшыла ў горную краіну, у горад Юды. ⁴⁰Яна ўвайшла ў дом Захарыі і прывітала Альжбету. ⁴¹Калі Альжбета пачула прывітанне Марыі, узварухнулася дзіцятка ва ўлонні яе, і напоўнілася Альжбета Духам Святым. ⁴²Яна ўсклікнула моцным голасам і сказала: «Благаслаўлёная Ты між жанчынамі і благаслаўлёны плод улоння Твайго. ⁴³Адкуль мне гэта, што Маці Пана майго прыйшла да мяне? ⁴⁴Бо калі голас прывітання Твайго загучаў у вушах маіх, узварухнулася радасна дзіцятка ва ўлонні маім. ⁴⁵І шчаслівая тая, якая паверыла, што споўніцца сказанае Ёй Панам».

⁴⁶І сказала Марыя:

«Велічае душа мая Пана,

⁴⁷і ўзрадаваўся дух мой у Богу, маім Збаўцу ⁴⁸бо глянуў Бог на пакору сваёй слугі. І цяпер благаслаўляць мяне будуць усе пакаленні. ⁴⁹Бо вялікае ўчыніў мне Усемагутны, а імя Яго святое. ⁵⁰І міласэрнасць Яго з пакалення ў пакаленне над тымі, хто Яго баіцца. ⁵¹Паказаў моц сваёй правіцы, рассеяў тых, хто пыхлівы сэрцам. ⁵²Скінуў магутных з трона і ўзвысіў пакорных. ⁵³Дабром галодных насыціў, а багатых ні з чым адправіў. ⁵⁴Прыняў свайго слугу Ізраэля, памятаючы пра сваю міласэрнасць, ⁵⁵як абяцаў бацькам нашым, Абрагаму і яго патомству навекі».

⁵⁶Прабыла Марыя ў Альжбеты каля трох месяцаў і вярнулася ў свой дом.

Разважанне да Божага слова

Марыя, па сваёй дабрыні, ідзе дапамагчы цяжарнай Альжбеце, якая, натхнёная Святым Духам, хваліць Марыю за веру ў словы анёльскага паслання. Марыя - наш вялікі прыклад веры, бо Яна прымае ўсё, што Яе спаткае на шляху.

Марыя таксама з'яўляецца прыкладам удзячнасці Богу, бо прызнае, што ўсё паходзіць з рук Бога. «Бо вялікія рэчы ўчыніў мне Усемагутны». Яна моліцца з вялікай пакорай, усведамляючы сваю ўласную нязначнасць. «Марыя, наша Маці, дапамажы нам вучыцца ў Цябе і ісці за Тваім Сынам Езусам Хрыстом у веры і пакоры».

Размова

Памятаючы, што я ў прысутнасці Бога,
уяўляю Езуса побач
і кажу ўсё, што цяпер маю на думцы і на сэрцы,
размаўляючы як сябра з сябрам.

Заканчэнне

Я дзякую Богу за магчымасць правесці сам-насам з Ім некалькі хвілін,
і цяпер іду далей з радасцю і надзеяй
служыць Яго народу.

Амэн