Прысутнасць

Стаю ў Тваёй прысутнасці, Божа.
Няхай заўсёды ў мяне будзе час, каб бачыць і смакаваць
прыгажосць, якую Ты стварыў
дзеля майго захаплення.

Свабода

«Тоўстае і бясформеннае бервяно
ніколі не паверыла б, што можа стаць статуяй,
якой будуць захапляцца як цудам скульптуры,
і ніколі не скарылася б разцу скульптара,
які дзякуючы свайму генію бачыць, што з яго можна зрабіць» (Святы Ігнацый).
Прашу аб ласцы, каб дазволіць любячаму Стварыцелю фармаваць мяне.

Усведамленне

Усведамляючы Тваю прысутнасць, Пане,
праглядаю сваё нядаўняе мінулае.
Дазволь мне быць шчырым з самім сабой і з Табой
наконт таго, што я зрабіў сёння,
бо я ведаю, што Ты любіш праўду ў сэрцы
і прымаеш мяне такім, які я ёсць.

Божае слова

⁴³Вы чулі, што сказана: “Любі бліжняга твайго і ненавідзь ворага твайго”. ⁴⁴А Я кажу вам: любіце ворагаў вашых і маліцеся за тых, хто пераследуе вас, ⁴⁵каб сталіся вы сынамі Айца вашага, які ў нябёсах. Бо Ён загадвае сонцу свайму ўзыходзіць над дрэннымі і добрымі і пасылае дождж на справядлівых і несправядлівых. ⁴⁶Калі ж вы будзеце любіць тых, хто любіць вас, якую маеце ўзнагароду? Ці ж не тое самае робяць і мытнікі? ⁴⁷І калі вітаеце толькі братоў вашых, што асаблівага робіце? Ці ж не тое самае робяць і язычнікі? ⁴⁸Таму будзьце дасканалымі, як дасканалы Айцец ваш Нябесны.

Разважанне да Божага слова

Хрысціянства мае несці ў наш свет любоў, радасць, спакой, прабачэнне, дабрыню, мужнасць, доўгацярплівасць і ўсе дары Святога Духа. Мы пакліканы імкнуцца да дасканаласці, "як дасканалы Айцец ваш Нябесны“. Патрабаванні Валадарства сапраўды высокія, але ў свеце было б больш дабра, калі б мы прынамсі стараліся дасягнуць гэтага стандарту. Памолімся, каб убачыць, як зрабіць свой невялікі ўнёсак у будаванне новага свету, дзе нянавісць раствараецца ў міласэрнасці і дзе пануе дабрыня.

Размова

Езу, Ты заўсёды чакаеш мяне.
Часам я адчуваю сябе скаваным
турботамі гэтага жыцця.
Дай мне больш унутранай цішыні,
Каб спазнаць Твой мір, Твой супакой.

Заканчэнне

Я дзякую Богу за магчымасць правесці сам-насам з Ім некалькі хвілін,
і цяпер іду далей з радасцю і надзеяй
служыць Яго народу.

Амэн