Прысутнасць

Езу, сёння я звяртаюся да Цябе інакш, чым звычайна. Часцей я прыходжу з просьбамі. Сёння хачу проста пабыць у Тваёй прысутнасці. Няхай маё сэрца адгукнецца на Тваю Любоў.

Свабода

Стараюся адпусціць хваляванні і турботы,
якія зараз абцяжарваюць мяне.
Аддаю ўсе свае клопаты ў Божыя рукі
– хаця б на гэтыя некалькі хвілін малітвы.

Усведамленне

Пане, адкрый маё сэрца на тое, каб пачуць і прыняць Тваё Слова. Няхай гэта прынясе вялікі плён у маім жыцці і ў жыцці іншых людзей.

Божае слова

⁷Калі моліцеся, не гаварыце шмат, як язычнікі, бо яны думаюць, што ў мнагаслоўі сваім будуць пачутыя. ⁸Не будзьце ж падобнымі да іх, бо ведае Айцец ваш, у чым вы маеце патрэбу, раней, чым вы папросіце ў Яго.

⁹Таму вы так маліцеся:

Ойча наш, каторы ёсць у небе, свяціся імя Тваё,

¹⁰прыйдзі Валадарства Тваё, будзь воля Твая, як у небе, так і на зямлі. ¹¹Хлеба нашага штодзённага дай нам сёння^{, 12}і адпусці нам правіны нашы, як і мы адпускаем вінаватым нашым. ¹³ І не ўводзь нас у спакусу, але збаў нас ад злога.^,

¹⁴Калі вы будзеце адпускаць людзям правіны іхнія, то Айцец ваш Нябесны адпусціць і вам. ¹⁵А калі не будзеце адпускаць людзям, то і Айцец ваш не адпусціць вам правінаў вашых.

Разважанне да Божага слова

У малітве не ідзецца пра слова, а пра сустрэчу з Асобай. Калі мы звяртаемся да Яго ў малітве, ці сапраўды мы цэнім Яго прысутнасць? Ці выказваем сваю пашану словамі ад сэрца, ці проста паўтараем завучаныя словы з дзяцінства? Папа Францішак пісаў: "Для кожнага вучня істотна праводзіць час з Настаўнікам, каб слухаць Яго і заўсёды вучыцца ў Яго... Таму дазволь мне спытаць: ці бываюць моманты, калі ты моўчкі прабываеш у прысутнасці Пана, калі без спеху праводзіш з Ім час, калі грэешся ў Ягоным позірку?“

Размова

Няхай Твой Святы Дух вядзе мяне
ва ўсіх кантактах з людзьмі.
Няхай дасць мне здольнасць з любоўю размаўляць з усімі.

Заканчэнне

Хвала Айцу і Сыну, і Духу Святому.
як было спрадвеку,
цяпер і заўсёды,
і навекі вечныя. Амэн.

Амэн