Прысутнасць

“Свет прасякнуты веліччу Бога” (Джэралд Мэнлі Хопкінс)
Некаторы час затрымаюся ў прысутнасці Бога навокал і ўва мне,
у кожнай часцінцы майго цела
і глыбока ў сэрцы.

Свабода

Калі Бог паспрабуе мне нешта сказаць, ці пачую я?
Калі Бог захоча суцешыць мяне ці даручыць нешта, ці заўважу я?
Прашу аб ласцы вызваліцца ад уласных клопатаў
і быць чуйным да таго, што Бог можа сказаць мне.

Усведамленне

Пане, падрыхтуй глебу майго сэрца, каб прыняць зерне Твайго Слова. Няхай яно пусціць карані, расце і дасць багаты ўраджай дзеля Тваёй хвалы і майго дабра.

Божае слова

¹¹А калі людзі даведаліся, пайшлі за Ім. Ён прыняў іх, гаварыў ім пра Валадарства Божае і аздараўляў тых, каму было патрэбнае аздараўленне.

¹²Калі дзень пачаў хіліцца да вечара, падышлі да Яго Дванаццаць і сказалі Яму: «Адпусці людзей, каб яны пайшлі ў навакольныя паселішчы і вёскі, дзе знойдуць начлег і ежу, бо мы тут у пустынным месцы». ¹³Але Ён сказаў ім: «Вы дайце ім есці». Яны сказалі: «У нас няма больш пяці хлябоў і дзвюх рыбін, хіба што пойдзем купім ежы на ўвесь гэты люд». ¹⁴Было ж каля пяці тысяч чалавек. Але Ён сказаў вучням сваім: «Загадайце ім сесці групамі па пяцьдзясят чалавек». ¹⁵І зрабілі так, і пасадзілі ўсіх. ¹⁶А Ён, узяўшы пяць хлябоў і дзве рыбіны, паглядзеў на неба, благаславіў іх і паламаў, і даваў вучням, каб раздавалі людзям. ¹⁷І елі, і насыціліся ўсе, а рэшты кавалкаў сабрана было дванаццаць кашоў.

Разважанне да Божага слова

Калі Езус корміць пяць тысяч у гэтым аддаленым месцы, мы ўспамінаем, як Бог карміў свой народ маннай у пустыні. Гэтае свята "Corpus Christi" таксама гаворыць нам пра значна большы цуд: Езус дае нам сваё Цела і Кроў на працягу ўжо больш за дзве тысячы гадоў. Святы Ігнацый заклікае нас „заўсёды з глыбокай любоўю разважаць пра тое, як Пан хоча аддаць Сябе нам“.

Дар, які не прынялі і якому не ўсцешыліся, губляе сваю сілу набліжаць нас да Дарыцеля. Ці прымаем мы нашага Пана з цеплынёй і ўдзячнасцю падчас святой ахвяры Імшы?

Размова

Езу, Ты заўсёды чакаеш мяне.
Часам я адчуваю сябе скаваным
турботамі гэтага жыцця.
Дай мне больш унутранай цішыні,
Каб спазнаць Твой мір, Твой супакой.

Заканчэнне

Дзякую, Пане, за дар часу, праведзенага ў Тваёй прысутнасці і за ўсе Твае натхненні.

Амэн