Прысутнасць

“Свет прасякнуты веліччу Бога” (Джэралд Мэнлі Хопкінс)
Некаторы час затрымаюся ў прысутнасці Бога навокал і ўва мне,
у кожнай часцінцы майго цела
і глыбока ў сэрцы.

Свабода

Дзякуй, Пане, што маю свабоду.
Няхай жа я здолею выкарыстаць гэты дар, каб рабіць тое, што магу,
для прыгнечаных і абцяжараных людзей.

Усведамленне

Пане, мой Божа, у Тваёй любячай прысутнасці я разгортваю свой дзень, нібы скрутак,
пачынаючы з гэтага часу і азіраючыся назад, момант за момантам.
У кожным з іх я вылучаю дабро і святло, ва ўдзячнасці.
Затым звяртаю ўвагу на цені і на тое, што яны мне кажуць,
шукаючы ў Цябе аздараўлення, разумення і прабачэння.

Божае слова

¹⁸Калі гаварыў з імі, падышоў да Яго адзін кіраўнік і, пакланіўшыся Яму, сказаў: «Дачка мая толькі што памерла; але прыйдзі, ускладзі на яе руку сваю, і яна будзе жыць». ¹⁹Тады Езус падняўся і разам са сваімі вучнямі пайшоў за ім. ²⁰І вось, жанчына, якая дванаццаць гадоў цярпела на крывацёк, падышла ззаду і дакранулася да краю Ягонага плашча, ²¹бо казала сабе: «Калі толькі дакрануся да Ягонага плашча, выздаравею». ²²А Езус павярнуўся і, убачыўшы яе, сказаў: «Будзь адважнай, дачка, вера твая ўратавала цябе». З таго часу жанчына выздаравела. ²³Калі Езус увайшоў у дом кіраўніка, Ён убачыў жалейнікаў і ўзрушаны натоўп ²⁴і сказаў: «Выйдзіце, бо дзяўчынка не памерла, а спіць». І насміхаліся з Яго. ²⁵А калі натоўп вывелі, Ён увайшоў, узяў дзяўчынку за руку, і яна ўстала. ²⁶Тады разышлася пра гэта пагалоска па ўсёй гэтай зямлі.

Разважанне да Божага слова

Кіраўнік сінагогі выказаў вялікую веру ў моц Езуса, нават у здольнасць вярнуць жыццё мёртвым. Яго вера была ўзнагароджана: Ён узяў дзяўчынку за руку і вярнуў яе бацькам. У Евангеллі мы бачым не раз, што , калі Езус бярэ кагосьці за руку, адбываецца магутнае вяртанне да жыцця і здароўя. Папросім у гэтай малітве нашага Пана ўзяць кожнага з нас за руку і весці за Сабой.

Размова

Добры Езу, я магу адкрыць Табе сэрца.
Магу сказаць Табе ўсё, што мяне турбуе.
Я ведаю, што Цябе хвалююць усе мае клопаты.
Навучы мяне жыць, не забываючыся,
што Ты ахінаеш мяне апекай сёння
і будзеш клапаціцца заўтра і ва ўсе дні жыцця майго.

Заканчэнне

Хвала Айцу і Сыну, і Духу Святому.
як было спрадвеку,
цяпер і заўсёды,
і навекі вечныя. Амэн.

Амэн