Прысутнасць

Кожны момант напоўнены хвалебнай прысутнасцю Бога. Калі я ўсё больш і больш аддаюся цеснай еднасці з Тым, хто стварыў мяне, адкрываю, што ў мяне проста няма часу турбавацца.

Свабода

Пане, Ты стварыў мяне для жыцця ў свабодзе. Няхай Твой Святы Дух вядзе мяне вольна крочыць за Табой. Укарані ў маім сэрцы жаданне пазнаваць і любіць Цябе з кожным днём усё больш.

Усведамленне

Усведамляючы Тваю прысутнасць, Пане,
праглядаю сваё нядаўняе мінулае.
Прагну быць шчырым з самім сабой адносна ўсяго, што адбылося,
і сваіх думак, слоў і ўчынкаў,
бо я ведаю, што Ты любіш праўду ў сэрцы
і прымаеш мяне такім, які я ёсць.

Божае слова

³²Калі ж тыя выходзілі, прывялі да Езуса нямога чалавека, апанаванага злым духам. ³³І калі злы дух быў выгнаны, нямы пачаў гаварыць, а людзі казалі са здзіўленнем: «Ніколі не было такога ў Ізраэлі!» ³⁴ А фарысеі казалі: «Князем злых духаў Ён выганяе злых духаў».

³⁵І хадзіў Езус па ўсіх гарадах і паселішчах, навучаючы ў іхніх сінагогах, абвяшчаючы Евангелле Валадарства і вылечваючы ўсялякую хваробу і ўсялякую немач. ³⁶Убачыўшы натоўпы людзей, Ён змілаваўся над імі, бо яны былі знясіленыя і пакінутыя, як авечкі без пастыра. ³⁷Тады Ён сказаў вучням сваім: «Жніво сапраўды вялікае, ды работнікаў мала; таму прасіце Гаспадара жніва, каб паслаў работнікаў на жніво сваё».

Разважанне да Божага слова

Мы бачым Езуса ў паўнаце Яго служэння іншым. Спагадным позіркам Ён заўважае іх вялікую патрэбу ў пастыры. Зараз і сучаснаму свету так неабходны пастыры, якія будуць сведчыць пра нябачную рэальнасць Бога. Памолімся аб пакліканнях да святарства і манаскага жыцця.

Размова

Якія пачуцці ўзнікаюць ва мне, калі я малюся і разважаю над Божым Словам?
Я ўяўляю самога Езуса, які сядзіць ці стаіць каля мяне, і адкрываю Яму сваё сэрца.

Заканчэнне

Хвала Айцу і Сыну, і Духу Святому.
як было спрадвеку,
цяпер і заўсёды,
і навекі вечныя. Амэн.

Амэн