Прысутнасць

На што звяртаю ўвагу, тое і фармуе мяне.
Заўважу прысутнасць Бога – няспынную, блізкую, любячую,
сярод безлічы рэчаў, якія падтрымліваюць жыццё.
Затрымаюся і памалюся аб тым, каб дазволіць Богу падчас сённяшняй малітвы
дапамагчы мне расці і сталець.

Свабода

Пане, навучы мяне шанаваць дар свабоды.
Ты даў мне вялікае благаслаўленне свабоды духу.
Напоўні мой дух Тваім супакоем і Тваёй радасцю.

Усведамленне

Дапамажы мне, Пане, лепш усведамляць Тваю прысутнасць.
Навучы мяне распазнаваць Тваю прысутнасць у іншых.
А сэрца напоўні ўдзячнасцю за выпадкі, калі Ты дзейнічаў праз іншых людзей, выяўляючы нязмерную любоў і клопат.

Божае слова

³¹Пасля Ён прапанаваў ім іншую прыпавесць, кажучы: «Валадарства Нябеснае падобнае да гарчычнага зерня, якое ўзяў чалавек і пасеяў на полі сваім. ³²Хоць яно меншае за ўсялякае насенне, калі вырасце, бывае вышэйшым за іншыя расліны і становіцца дрэвам, так што прылятаюць птушкі нябесныя і гняздзяцца ў галінах яго».

³³Іншую прыпавесць прапанаваў ім: «Валадарства Нябеснае падобнае да закваскі, якую жанчына ўзяла і паклала ў тры меры мукі, аж усё ўкісла».

³⁴Усё гэтае Езус гаварыў народу прыпавесцямі і без прыпавесці не казаў ім, ³⁵каб збылося сказанае прарокам:

«Адкрыю ў прыпавесцях вусны Мае, раскажу ўтоенае ад стварэння свету».^,

Разважанне да Божага слова

Кажуць, тое, што расце павольна, будзе трывалым. З моманту нашага хросту пачалося жыццё ў ласцы, Святы Дух пасяліўся ў нас. Падобна маленькаму гарчычнаму зерню, гэтае жыццё ласкі ўзрастае, дзякуючы выхаванню ў веры і сілкаванню малітвай і сакрамэнтамі. Валадарства Божае ўнутры нас, аднак патрэбен час і цярплівасць, каб Бог адкрыў яго нам на духоўным жыццёвым шляху. Папросім Святога Духа, каб Ён вёў нас, а Езуса — быць нашым сябрам і спадарожнікам жыцця.

Размова

Ці заўважаю, як рэагую на малітву Словам Божым?
Ці адчуваю занепакоенасць, суцяшэнне, гнеў?
Уяўляючы Езуса, які сядзіць ці стаіць побач са мной,
выказваю свае пачуцці, як добраму сябру.

Заканчэнне

Хвала Айцу і Сыну, і Духу Святому.
як было спрадвеку,
цяпер і заўсёды,
і навекі вечныя. Амэн.

Амэн