Прысутнасць

“Бог — наша прыстанішча і сіла, надзейная дапамога ў нядолі” (Пс 46, 2). Пане, словы псальма вядуць нас да спакою і велічы Тваёй прысутнасці.

Свабода

«Вельмі мала людзей,
якія разумеюць, што з імі зрабіў бы Бог,
калі б яны аддаліся ў Ягоныя рукі,
і дазволілі Ягонай ласцы сфармаваць сябе» (Святы Ігнацый).
Прашу аб ласцы цалкам даверыцца Божай любові.

Усведамленне

Нам усім трэба на нейкі час аддаляцца ад штодзённых клопатаў.
Мы ведаем, што нашае цела патрабуе адпачынку.
Калі мы прыходзім у прысутнасць Тваю, Пане,
то аднаўляем сэрца, розум і дух.

Божае слова

⁴⁷Валадарства Нябеснае падобнае таксама да закінутага ў мора нерата, што збірае рыбу ўсялякага віду. ⁴⁸Калі ён напоўніўся, яго выцягнулі на бераг і, сеўшы, сабралі добрае ў посуд, а дрэннае выкінулі вон. ⁴⁹Так будзе пры сканчэнні свету: выйдуць анёлы, і аддзеляць ліхіх ад праведнікаў, ⁵⁰і кінуць іх у вогненную печ. Там будзе плач і скрыгатанне зубоў.

⁵¹Ці зразумелі вы ўсё гэта?» Яны адказалі Яму: «Так». ⁵²Ён жа сказаў ім: «Вось чаму ўсялякі кніжнік, навучаны пра Валадарства Нябеснае, падобны да гаспадара, які вымае са скарбніцы сваёй новае і старое». ⁵³Закончыўшы гэтыя прыпавесці, Езус пайшоў адтуль.

Разважанне да Божага слова

Бог з бясконцай цярплівасцю і любоўю чакае да канца нашага жыцця, і толькі пасля смерці наступае для нас першы суд. Ён дазваляе сонцу свяціць, а дажджу пралівацца на справядлівых і несправядлівых. Усе людзі маюць дар выбару паміж дабром і злом, але ў кожнага выбару ёсць наступствы. Памолімся аб сапраўдным распазнаванні Божай волі і добрага шляху жыцця.

Размова

Пане, я ведаю, што калі я звяртаюся да Цябе, мне не патрэбныя словы.
Ты бачыш сэрца.
Ты ведаеш мае жаданні і патрэбы.
Аддаю сябе ў Твае рукі.

Заканчэнне

Я дзякую Богу за магчымасць правесці сам-насам з Ім некалькі хвілін,
і цяпер іду далей з радасцю і надзеяй
служыць Яго народу.

Амэн