Прысутнасць

Пане, пакуль я тут,
напоўні маё сэрца і ўсю маю істоту
цудам Тваёй прысутнасці.

Свабода

Мне трэба суцішыцца, падняцца над шумам,
які перашкаджае, раздзяляе,
ізалюе.
Мне вельмі неабходна зноў слухаць Бога ў цішыні і спакоі.

Усведамленне

Дзе ў сваім жыцці я адчуваю надзею, заахвочванне і бачу перспектывы росту? Прыгадваючы мінулыя некалькі месяцаў, ці не адчуваю я, якая дзейнасць і якія падзеі прыносілі багаты плён? Калі так, то прымаю рашэнне прысвячаць ім больш часу у будучыні.

Божае слова

¹Валадарства Нябеснае падобнае да гаспадара дому, які выйшаў на світанні наняць работнікаў у свой вінаграднік. ²Дамовіўшыся з работнікамі па дынару за дзень, ён паслаў іх у свой вінаграднік. ³Пасля ён выйшаў каля трэцяй гадзіны і, убачыўшы іншых, якія стаялі на рынку без працы, ⁴cказаў ім: “Ідзіце і вы ў мой вінаграднік, а я справядліва заплачу вам”. ⁵Яны пайшлі. Зноў выйшаўшы каля шостай і дзевятай гадзіны, зрабіў тое самае. ⁶Выйшаўшы каля адзінаццатай гадзіны, ён знайшоў іншых, якія стаялі без працы, і сказаў ім: “Чаму вы стаіце тут цэлы дзень без працы?” ⁷Яны сказалі яму: “Нас ніхто не наняў”. Ён сказаў ім: “Ідзіце і вы ў вінаграднік”. ⁸Калі ж настаў вечар, гаспадар вінаградніку сказаў свайму эканому: “Пакліч работнікаў і заплаці, пачаўшы з апошніх да першых”. ⁹I тыя, хто прыйшоў каля адзінаццатай гадзіны, атрымалі па дынары. ¹⁰Тыя, што прыйшлі першымі, думалі, што атрымаюць больш, але яны таксама атрымалі па дынары. ¹¹Узяўшы, яны пачалі наракаць на гаспадара дому, ¹²кажучы: “Гэтыя апошнія працавалі адну гадзіну, і ты зраўняў іх з намі, якія перанеслі цяжкі дзень і спёку!” ¹³У адказ ён сказаў аднаму з іх: “Дружа, я не крыўджу цябе. Хіба не аб дынары ты дамаўляўся са мною? ¹⁴Вазьмі сваё і ідзі. Я ж хачу даць гэтаму апошняму так, як і табе. ¹⁵Ці ж не дазволена мне рабіць са сваім тое, што хачу? Ці вока тваё зайздросціць, што я добры?” ¹⁶Гэтак апошнія будуць першымі, а першыя — апошнімі».^,

Разважанне да Божага слова

Бог бясконца шчодры. Усё, што мы маем, з'яўляецца Ягоным дарам, у тым ліку само жыццё. Варта толькі зірнуць на незвычайную разнастайнасць рэчаў у гэтым цудоўным свеце і на плады зямлі на паліцах нашых супермаркетаў. Богу належыць усё, што існуе. У прыпавесці Ён кажа: «Я ж хачу даць». Для таго, хто любіць, даваць любімаму штосьці - гэта крыніца радасці. Будзем шчодрымі, як шчодры Айцец наш Нябесны.

Магчыма, будзе жаданне памаліцца малітвай аб велікадушным служэнні Богу, якая прыпісваецца святому Ігнацыю: «Пане, навучы мяне велікадушнасці. Навучы мяне служыць Табе так, як Ты заслугоўваеш;
даваць, не лічачы коштаў; змагацца, не зважаючы на раны, аддаваць усе сілы, не шукаючы адпачынку, працаваць, не чакаючы ўзнагароды, акрамя ўсведамлення, што я выконваю Тваю волю».

Размова

Няхай Твой Святы Дух вядзе мяне
ва ўсіх кантактах з людзьмі.
Няхай дасць мне здольнасць з любоўю размаўляць з усімі.

Заканчэнне

Напоўнены любячай прысутнасцю Бога,
Я прашу Яго благаславіць мяне і накіроўваць мае крокі
у спаўненні Яго волі і супрацоўніцтве з Яго ласкай у сваім штодзённым жыцці.

Амэн