Прысутнасць

Бог са мной, але больш таго,
Бог ува мне, напаўняе жыццём.
Хаця б хвіліну пабуду ў жыццядайнай прысутнасці Бога
у маім целе, розуме, сэрцы
і ва ўсім маім жыцці.

Свабода

Пане, Ты даў мне вялікі дар свабоды.
У гэтыя часы, Пане, вызваляй мяне
ад любой формы расізму або нецярпімасці.
Нагадай мне, Пане, што ўсе мы роўныя
у Тваіх любячых вачах.

Усведамленне

Як я пачуваюся сёння?
Ці побач з Богам ці далёка ад Яго? Як мае адносіны з іншымі?
Ці ёсць за што быць удзячным? Дзякую…
Ці ёсць за што шкадаваць? Прашу прабачэння…

Божае слова

¹Езус зноў расказаў ім прыпавесць: ²«Валадарства Нябеснае падобнае да караля, які справіў вяселле для свайго сына. ³Ён паслаў сваіх слугаў паклікаць запрошаных на вяселле, але яны не хацелі прыйсці. ⁴Зноў паслаў іншых слугаў, кажучы: “Скажыце запрошаным: вось я прыгатаваў гасціну маю, зарэзаны валы мае і адкормленая жыўнасць, і ўсё падрыхтавана; прыходзьце на вяселле”. ⁵Але яны пагардзілі і адышлі, хто на сваё поле, а хто да свайго гандлю. ⁶Астатнія ж, схапіўшы слугаў ягоных, зняважылі і забілі іх. ⁷Кароль жа раззлаваўся і, паслаўшы войска сваё, знішчыў забойцаў гэтых і падпаліў іхні горад. ⁸Тады ён сказаў сваім слугам: “Вяселле гатова, але запрошаныя не былі годнымі. ⁹Таму пайдзіце на ростані і ўсіх, каго сустрэнеце, запрасіце на вяселле”. ¹⁰Тыя слугі, выйшаўшы на дарогі, сабралі ўсіх, каго знайшлі: і кепскіх, і добрых. І напоўнілася вяселле гасцямі.

¹¹Кароль, увайшоўшы паглядзець на гасцей, убачыў там чалавека, апранутага не ў вясельную вопратку, ¹²і сказаў яму: “Дружа, як ты ўвайшоў сюды, не маючы вясельнай вопраткі?” Той прамаўчаў. ¹³Тады кароль сказаў слугам: “Звяжыце яму ногі і рукі і выкіньце яго вон, у цемру. Там будзе плач і скрыгатанне зубоў”. ¹⁴Бо шмат пакліканых, але мала выбраных».

Разважанне да Божага слова

Мы ўсе запрошаны на нябесны банкет, але некаторыя адмаўляюцца і жывуць так, быццам ім гэта нецікава. Мы павінны чуваць і маліцца, каб быць гатовымі, калі атрымаем запрашэнне. «Шчаслівыя тыя слугі, якіх
гаспадар знойдзе ў чуванні, калі прыйдзе. Сапраўды кажу вам, што ён
падпяражацца і пасадзіць іх, і, падышоўшы, пачне служыць ім» (Лк 12:37).

Вясельная вопратка — белая вопратка хросту, якую неабходна трымаць чыстай, каб увайсці ў неба. У кнізе Апакаліпсіса можам прачытаць пра тых, хто прайшоў праз вялікі ўціск і "абмыў свае шаты, і выбеліў іх у крыві Баранка" (7:14).

Размова

“Няма цяпер ніякага асуджэння тым, хто ў Хрысце Езусе” (Рым 8:1). Я звяртаюся да Таго, Хто любіць мяне і ведае мяне лепш, чым я магу любіць ці ведаць сябе. Прашу Яго аб тым, што мне цяпер патрэбна.

Заканчэнне

Я дзякую Богу за магчымасць правесці сам-насам з Ім некалькі хвілін,
і цяпер іду далей з радасцю і надзеяй
служыць Яго народу.

Амэн