Прысутнасць

Перад тым, як пачаць малітву, паслухаю біццё сэрца,
рытм дыхання, плынь думак –
прыкметы няспыннага стваральнага дзеяння Бога ўва мне.
Затрымаюся на момант і адчую
гэтую Божую прысутнасць.

Свабода

Пане, Ты даў мне вялікі дар свабоды.
У гэтыя часы, Пане, вызваляй мяне
ад любой формы расізму або нецярпімасці.
Нагадай мне, Пане, што ўсе мы роўныя
у Тваіх любячых вачах.

Усведамленне

Езу, дзякую Табе за гэты момант, калі я адчуваю Тваю прысутнасць. Дапамажы мне ўзрастаць ва ўважнасці на Тваю прысутнасць у штодзённым жыцці і ў іншых людзях.

Божае слова

³⁴Калі фарысеі пачулі, што Езус прымусіў замоўкнуць садукеяў, яны сабраліся разам. ³⁵І адзін з іх, кніжнік, выпрабоўваючы Яго, спытаўся: ³⁶«Настаўнік, якая запаведзь найбольшая ў Законе?» ³⁷Езус адказаў яму: «“Любі Пана Бога твайго ўсім сэрцам тваім, і ўсёй душой тваёй, і ўсім розумам тваім”. ³⁸Гэта найбольшая і першая запаведзь. ³⁹Другая ж — падобная да яе: “Любі бліжняга твайго, як самога сябе”. ⁴⁰На гэтых дзвюх запаведзях грунтуецца ўвесь Закон і Прарокі».

Разважанне да Божага слова

Усе запаведзі падсумоўваюцца гэтымі дзьвюма, якія насамрэч з'яўляюцца адной, бо яны выходзяць з аднаго сэрца, якім мы жывём і любім. Святы Аўгустын сказаў: «Любі Бога - і рабі, што хочаш». Сапраўдная любоў будзе кіраваць усімі нашымі ўчынкамі.

Святы Ян Віянэй пісаў: «Чалавецтва мае высакародную задачу — маліцца і любіць. Маліцца і любіць — вось наша шчасце на зямлі». Насамрэч, гэта і ёсць мэта нашага жыцця на зямлі: развіваць асабістую здольнасць любіць, дадзеную Богам, каб у небе мы маглі злучыцца з Богам, які ёсць Любоў.

Размова

Маўкліва сяджу з маім Богам, які ведае кожную маю думку, кожную патрэбу і кожнае жаданне, і дазваляю Яму служыць мне ў гэты момант. Я атрымліваю неабходны для далейшай дарогі пасілак.

Заканчэнне

Хвала Айцу і Сыну, і Духу Святому.
як было спрадвеку,
цяпер і заўсёды,
і навекі вечныя. Амэн.

Амэн