Прысутнасць

Бог са мной, больш за тое, Бог ўва мне.
Хоць на хвіліну затрымаюся ў жыццядайнай прысутнасці Бога
у целе, розуме і сэрцы,
вось цяпер.

Свабода

Малюся аб ласцы, каб паверыць
у тое, кім я магу стаць і што рабіць,
калі толькі дазволю Богу, майму Стварыцелю, які так мяне любіць,
працягваць ствараць, накіроўваць і фармаваць мяне.

Усведамленне

Усведамляючы Тваю прысутнасць, Пане,
праглядаю сваё нядаўняе мінулае.
Дазволь мне быць шчырым з самім сабой і з Табой
наконт таго, што я зрабіў сёння,
бо я ведаю, што Ты любіш праўду ў сэрцы
і прымаеш мяне такім, які я ёсць.

Божае слова

²²Накіроўваючыся ў Ерузалем, Ён праходзіў праз гарады і вёскі і навучаў. ²³І нехта сказаў Яму: «Пане, няўжо мала тых, хто будзе збаўлены?» А Ён сказаў ім: ²⁴«Імкніцеся прайсці праз вузкую браму, бо, кажу вам, многія будуць спрабаваць увайсці, але не змогуць. ²⁵Калі гаспадар дому ўстане і зачыніць дзверы, тады вы, стоячы знадворку, пачнеце стукаць у дзверы і казаць: “Пане, адчыні нам”. А Ён адкажа вам: “Не ведаю вас, адкуль вы”. ²⁶І пачнеце казаць: “Мы елі і пілі перад Табою, і на вуліцах нашых навучаў Ты”. ²⁷Але Ён скажа вам: “Не ведаю вас, адкуль вы; адыдзіце ад Мяне ўсе, хто чыніць несправядлівасць”. ²⁸Там будзе плач і скрыгатанне зубоў, калі ўбачыце Абрагама, Ісаака і Якуба, і ўсіх прарокаў у Валадарстве Божым, а сябе выкінутымі вон. ²⁹Прыйдуць з усходу і з захаду, з поўначы і з поўдня і сядуць за стол у Валадарстве Божым. ³⁰І вось, апошнія будуць першымі, а першыя будуць апошнімі».

Разважанне да Божага слова

Усе людзі запрошаны на нябесную гасціну, запрошаны прыйсці да пазнання Пана, але кожны можа адмовіцца. Ніхто не прымусіць нас маліцца. Мы павінны самі гэтага прагнуць і выкарыстоўваць сродкі, каб узрастаць у малітоўным жыцці. «Малітва — гэта дар тым, хто моліцца» (святы Ян Лесвічнік).

Размова

Якія пачуцці ўзнікаюць ва мне, калі я малюся і разважаю над Божым Словам?
Я ўяўляю самога Езуса, які сядзіць ці стаіць каля мяне, і адкрываю Яму сваё сэрца.

Заканчэнне

Дзякую, Пане, за дар часу, праведзенага ў Тваёй прысутнасці і за ўсе Твае натхненні.

Амэн