Прысутнасць

Пане Езу, прыходжу да Цябе сёння з тугою па Тваёй прысутнасці. Я прагну любіць Цябе, як Ты любіш мяне. Няхай ніколі і нішто не разлучыць мяне з Табою.

Свабода

Пане, дазволь мне заўсёды
выконваць Тваю святую волю,
ведаючы, што Твая моц
правядзе мяне скрозь усе выпрабаванні.

Усведамленне

Духу Святы, прыйдзі і пасяліся ўва мне. Дай мне пазнаць, што я ўмілаванае дзіця Божае.

Божае слова

¹³Гора вам, кніжнікі і фарысеі, крывадушнікі, таму што зачыняеце Валадарства Нябеснае перад людзьмі! Бо самі не ўваходзіце і, калі ўваходзяць іншыя, не пускаеце іх. (14) ¹⁵Гора вам, кніжнікі і фарысеі, крывадушнікі, таму што абыходзіце мора і сушу, каб прыдбаць хоць аднаго новага верніка. Калі ж гэта здараецца, робіце яго сынам геены, удвая горшым, чым вы самі!

¹⁶Гора вам, сляпыя павадыры, якія кажаце: “Калі хто клянецца святыняй, то нічога; але калі хто клянецца золатам святыні, то абавязаны”. ¹⁷Неразумныя і сляпыя! Што большае: золата, ці святыня, якая асвячае золата? ¹⁸І зноў: “Калі хто клянецца ахвярнікам, то нічога; а калі клянецца дарам, што на ім, то абавязаны” ¹⁹Сляпыя! Што большае? Дар ці ахвярнік, які асвячае дар? ²⁰Таму той, хто клянецца ахвярнікам, клянецца і ім, і ўсім, што на ім. ²¹І той, хто клянецца святыняю, клянецца і ёю, і тым, хто жыве ў ёй. ²²А хто клянецца небам, клянецца тронам Божым і тым, хто сядзіць на ім.

Разважанне да Божага слова

На працягу стагоддзяў ілжэпрарокі ўвялі ў зман безліч людзей. У сучасным свеце ілжывыя вучэнні мы называем дэзінфармацыяй, але, кажучы простай мовай, гэта проста хлусня. Езус сказаў, што прыйшоў, каб сведчыць аб праўдзе. Будзем жа слухаць Яго, як сказаў нам Айцец.

Памолімся аб ласцы распазнавання, каб узрастаць у веры і рашучасці спаўняць тое, чаго Бог прагне ад нас.

Размова

Пане, дапамажы мне дастаткова сцішыцца, каб пачуць Твой вельмі ціхі голас. Дапамажы мне давяраць таму, што я чую. Тваё Слова прыносіць палёгку, суцяшэнне і падбадзёрванне. Усё іншае я аддаляю ад сябе.

Заканчэнне

Дзякую, Пане, за дар часу, праведзенага ў Тваёй прысутнасці і за ўсе Твае натхненні.

Амэн